-विराट कोहलीचा सहभाग तंदुरुस्ती चाचणीवर अवलंबून- जसप्रीत बुमराह आणि अक्षर पटेलाचा समावेश-यशस्वी जैस्वाल आणि प्रिन्स यादवला वगळले

नवी दिल्ली, 21 जून, (हिं.स.) - भारतीय क्रिकेट नियामक मंडळाने (बीसीसीआय) रविवारी इंग्लंडविरुद्धच्या तीन एकदिवसीय सामन्यांच्या मालिकेसाठी भारतीय संघाची घोषणा केली. भारतीय संघ शुभमन गिलच्या नेतृत्वाखाली खेळणार आहे. या मालिकेसाठी संघात विराट कोहलीचाही समावेश करण्यात आला आहे, परंतु त्याचा सहभाग त्याच्या तंदुरुस्तीवर अवलंबून आहे. अफगाणिस्तानविरुद्धच्या तिसऱ्या एकदिवसीय सामन्यात शतक झळकावणाऱ्या यशस्वी जैस्वालला संघात स्थान मिळालेले नाही.

बीसीसीआयच्या पुरुष निवड समितीने इंग्लंडविरुद्धच्या एकदिवसीय मालिकेसाठी संघ जाहीर केला आहे. पण त्यांनी स्पष्टपणे सांगितले आहे की या मालिकेत विराट कोहलीचा सहभाग तंदुरुस्ती चाचणीवर अवलंबून आहे. कोहलीची तंदुरुस्ती चाचणी २२ जून रोजी बीसीसीआयच्या सेंटर ऑफ एक्सलन्समध्ये घेतली जाईल. विराट कोहलीने आयपीएल २०२६ च्या अंतिम सामन्यात गुजरात टायटन्सविरुद्ध नाबाद ७५ धावा करून रॉयल चॅलेंजर्स बंगळूरुला विजय मिळवून दिला होता. याच सामन्यादरम्यान विराटला हॅमस्ट्रिंगची दुखापत झाली होती. दुखापतीमुळे विराट कोहली अफगाणिस्तानविरुद्धच्या एकदिवसीय मालिकेतून बाहेर पडला आहे. तो सध्या लंडनमध्ये पुनर्वसन उपचार घेत आहे.

कोहलीचा संघात समावेश करण्यात आला असला तरी, अष्टपैलू हार्दिक पांड्याला वगळण्यात आले आहे. हार्दिक दुखापतीतून सावरला होता आणि त्याने बीसीसीआयच्या प्रशिक्षण केंद्रात पुन्हा सराव सुरू केला होता. एकदिवसीय सामन्यांमध्ये खेळण्यासाठी तो पूर्णपणे तंदुरुस्त नसल्यामुळे या मालिकेत त्याचा सहभाग अनिश्चित मानला जात होता. हार्दिक दुखापतीतून पूर्णपणे सावरलेला नाही आणि आता अफगाणिस्तान दौऱ्यानंतर होणाऱ्या इंग्लंड दौऱ्यासाठी तो संघात स्थान मिळवू शकलेला नाही. परिणामी, नितीश रेड्डी यांची पुन्हा एकदा निवड झाली आहे.

सलामीवीर यशस्वी जैस्वालची इंग्लंड दौऱ्यासाठीच्या एकदिवसीय संघात निवड झालेली नाही. अफगाणिस्तानविरुद्धच्या तिसऱ्या एकदिवसीय सामन्यात शतक झळकावूनही त्याला संघात आपले स्थान टिकवता आले नाही. खरे तर, अफगाणिस्तानविरुद्धच्या एकदिवसीय मालिकेसाठी सुरुवातीला यशस्वीची निवड झाली नव्हती. कोहली दुखापतीमुळे बाहेर पडल्यानंतर त्याला संधी देण्यात आली. दरम्यान, संघाचा स्टार वेगवान गोलंदाज जसप्रीत बुमराह संघात परतला असून, प्रिन्स यादवला वगळण्यात आले आहे. वेगवान गोलंदाजांमध्ये, बुमराहसोबत गुरनूर, हर्षित राणा, प्रसिद्ध कृष्णा आणि अर्शदीप सिंग यांचा संघात समावेश आहे.

भारत आणि इंग्लंड यांच्यातील तीन एकदिवसीय सामन्यांची मालिका १४ जुलै रोजी एडजबॅस्टन येथे पहिल्या एकदिवसीय सामन्याने सुरू होईल. मालिकेतील दुसरा सामना १६ जुलै रोजी खेळला जाईल.तिसरा सामना १९ जुलै रोजी लंडनच्या ऐतिहासिक लॉर्ड्स मैदानावर खेळला जाईल. एकदिवसीय मालिकेपूर्वी, दोन्ही संघांमध्ये १ जुलैपासून पाच सामन्यांची टी-२० मालिका खेळवली जाईल, ज्यासाठी श्रेयस अय्यरच्या नेतृत्वाखालील संघ आधीच जाहीर करण्यात आला आहे.

---------------

हिंदुस्थान समाचार / वृषाली देशपांडे