रायगड, 22 जून (हिं.स.)। : रेपोली येथील ग्रामस्थांचे आराध्य दैवत असलेल्या श्री जाखमातादेवी मंदिराच्या नूतन भव्य सभामंडपाचा उद्घाटन सोहळा महाराष्ट्र राज्याचे कॅबिनेट मंत्री भरतशेठ गोगावले यांच्या शुभहस्ते भक्तिमय आणि उत्साहपूर्ण वातावरणात संपन्न झाला. या सोहळ्यामुळे ग्रामस्थांमध्ये आनंदाचे वातावरण निर्माण झाले असून मंदिर परिसराला नवे वैभव प्राप्त झाले आहे.

उद्घाटनानंतर मंत्री भरतशेठ गोगावले यांनी श्री जाखमातादेवीचे दर्शन घेऊन राज्यातील तसेच परिसरातील जनतेच्या सुख, समृद्धी, आरोग्य आणि भरभराटीसाठी देवीच्या चरणी प्रार्थना केली. यावेळी त्यांनी मंदिर परिसराच्या विकासासाठी ग्रामस्थांनी केलेल्या योगदानाचे आणि लोकसहभागातून उभारण्यात आलेल्या सुविधांचे कौतुक केले. भविष्यातही मंदिर परिसराच्या विकासासाठी आवश्यक ते सहकार्य करण्यात येईल, अशी ग्वाही त्यांनी दिली.

कार्यक्रमानिमित्त रेपोली गावातील ग्रामस्थांनी मंत्री गोगावले यांचे उत्स्फूर्त स्वागत केले. सोहळ्यास माता-भगिनी, ग्रामस्थ, विविध सामाजिक व धार्मिक संस्थांचे पदाधिकारी, कार्यकर्ते तसेच मान्यवर मोठ्या संख्येने उपस्थित होते. संपूर्ण परिसर भक्तिमय वातावरणाने भारावून गेला होता.

नूतन सभामंडपामुळे धार्मिक कार्यक्रम, कीर्तन, भजन, सांस्कृतिक उपक्रम तसेच विविध सामाजिक आणि सामुदायिक कार्यक्रमांचे आयोजन अधिक सुसज्ज व व्यापक स्वरूपात करता येणार आहे. त्यामुळे गावाच्या सामाजिक आणि सांस्कृतिक विकासाला चालना मिळणार असल्याची भावना उपस्थितांनी व्यक्त केली.

कार्यक्रमाचा समारोप श्री जाखमातादेवीच्या जयघोषात आणि ग्रामस्थांच्या उत्स्फूर्त सहभागात झाला. या भव्य सभामंडपामुळे मंदिर परिसराच्या विकासात नवा अध्याय सुरू झाल्याचे मत उपस्थितांनी व्यक्त केले.

---------------

हिंदुस्थान समाचार / संदेश साळुंके (रायगड)