नांदेड, 22 जून (हिं.स.) : नांदेड स्थानिक स्वराज्य संस्था मतदारसंघाच्या विधान परिषद निवडणुकीत अमरनाथ राजूरकर यांनी विजय संपादन करत विधान परिषदेवरील आपली निवड निश्चित केली आहे. त्यांच्या विजयामुळे महायुतीच्या कार्यकर्त्यांमध्ये उत्साहाचे वातावरण निर्माण झाले आहे.

स्थानिक स्वराज्य संस्थांमधील सदस्यांचा मोठा पाठिंबा मिळाल्याने अमरनाथ राजूरकर यांनी ही निवडणूक जिंकली. निकाल जाहीर होताच कार्यकर्त्यांनी जल्लोष करत एकमेकांना मिठाई भरवून आनंदोत्सव साजरा केला.

राजूरकर यांच्या विजयाबद्दल राजकीय, सामाजिक आणि शैक्षणिक क्षेत्रातील अनेक मान्यवरांनी त्यांचे अभिनंदन केले आहे. नांदेड जिल्ह्याच्या विकासाशी संबंधित प्रश्न विधान परिषदेत प्रभावीपणे मांडण्यासाठी ते प्रयत्नशील राहतील, असा विश्वास त्यांच्या समर्थकांनी व्यक्त केला.

विजयानंतर प्रतिक्रिया देताना अमरनाथ राजूरकर यांनी नांदेड जिल्ह्याच्या सर्वांगीण विकासासाठी कटिबद्ध राहणार असल्याचे सांगितले. स्थानिक स्वराज्य संस्थांच्या अपेक्षा पूर्ण करण्यासाठी आणि विकासकामांना गती देण्यासाठी प्राधान्याने काम करण्यात येईल, असेही त्यांनी नमूद केले.

या विजयामुळे नांदेड जिल्ह्यात महायुतीचे राजकीय बळ अधिक मजबूत झाल्याचे मानले जात असून, आगामी काळात जिल्ह्याच्या विकासासाठी सकारात्मक दिशा मिळेल, अशी अपेक्षा व्यक्त होत आहे.

------------------------

हिंदुस्थान समाचार / Sangita Hanumant Rao Chitanis