मुंबई, 23 जून (हिं.स.)। ऍक्सिस बँकेने महाराष्ट्रातील आपली शाखा बँकिंग आणि एमएसएमई क्षमतांची सांगड घालत राज्याच्या विकासाप्रती असलेली कटिबद्धता अधिक दृढ केल्याचे मुंबईत झालेल्या मीडिया राउंडटेबलमध्ये स्पष्ट केले. बँकेच्या वरिष्ठ अधिकाऱ्यांनी महाराष्ट्रातील ग्राहक, उद्योजक आणि उद्योगांना पाठबळ देण्यासाठी प्रत्यक्ष शाखा संपर्क, डिजिटल सेवा आणि नातेसंबंधाधारित बँकिंग यांचा समन्वय कसा साधला जात आहे, यावर सविस्तर प्रकाश टाकला.

बँकेचे देशभरातील जाळे ६,२७५ शाखा आणि १२,७९६ एटीएम व रोख पुनर्भरण यंत्रांपर्यंत विस्तारले असून त्यापैकी जवळपास ४७ टक्के उपस्थिती ग्रामीण आणि निमशहरी भागांत आहे. महाराष्ट्रातच ६४० शाखा आणि २,०२१ एटीएम व रोख जमा यंत्रांद्वारे बँकेने भक्कम पायाभूत उपस्थिती निर्माण केली आहे, तर मुंबईत २६२ शाखा आणि १,०४८ एटीएम व रोख जमा यंत्रे कार्यरत आहेत. ग्राहक व्यवहार मोठ्या प्रमाणावर डिजिटल होत असतानाही, शाखा आजही सल्लागार, आर्थिक नियोजन आणि विश्वासार्ह मार्गदर्शनाची केंद्रे म्हणून महत्त्वाची भूमिका बजावत असल्याचे बँकेने सांगितले.

एमएसएमई क्षेत्रात अॅक्सिस बँकेची ताकदही लक्षणीय आहे. बँकेचे एकत्रित लघु व्यवसाय बँकिंग, सूक्ष्म आणि लघु उद्यम तसेच मध्यम कॉर्पोरेट कर्ज पुस्तक सुमारे २.९३ लाख कोटी रुपयांवर पोहोचले असून त्याचा एकूण कर्ज पुस्तिकेत २३.८ टक्के वाटा आहे. राष्ट्रीय स्तरावर एमएसएमई क्षेत्रातील बँकेचा ८.१ टक्के बाजार हिस्सा आहे. लघु व्यवसाय बँकिंग, सूक्ष्म आणि लघु उद्यम तसेच मध्यम कॉर्पोरेट पुस्तकांमध्ये अनुक्रमे १७ टक्के, २४ टक्के आणि ३३ टक्के वाढ नोंदली गेली आहे. पुरवठा साखळी वित्तपुरवठा पुस्तकातही ३६ टक्के वाढ झाली असून इन्व्हॉईसमार्टद्वारे २.७८ लाख कोटी रुपयांहून अधिक वित्तपुरवठा सुलभ झाला आहे.

मुंबईतील बर्गंडी खात्यांचा सरासरी आकार राष्ट्रीय सरासरीपेक्षा १३ टक्के अधिक असल्याचेही नमूद करण्यात आले. बँकेने ‘सिद्धी’ आणि ‘आदी’ यांसारख्या कृत्रिम बुद्धिमत्ता आधारित साधनांचा वापर, तसेच शाश्वत, डिजिटल आणि संबंधाधारित बँकिंग मॉडेलमधून महाराष्ट्रातील उद्योग, निर्यातदार, उत्पादक आणि नवउद्योजकांना अधिक सक्षम करण्याचा निर्धार व्यक्त केला.

---------------

हिंदुस्थान समाचार / Suraj Chaugule