मुंबई, 23 जून, (हिं.स.)। कमकुवत जागतिक संकेत, आशियाई बाजारातील विक्रीचा दबाव आणि निफ्टीच्या साप्ताहिक समाप्तीमुळे मंगळवारी देशांतर्गत शेअर बाजारात मोठी घसरण झाली. दिवसभर विक्रीचे वर्चस्व राहिल्याने मुंबई शेअर बाजाराचा सेन्सेक्स आणि राष्ट्रीय शेअर बाजाराचा निफ्टी हे दोन्ही प्रमुख निर्देशांक १.१६ टक्क्यांच्या घसरणीसह बंद झाले. या घसरणीमुळे गुंतवणूकदारांच्या संपत्तीत तब्बल ४.६३ लाख कोटी रुपयांची घट झाली.

व्यवहाराच्या सुरुवातीला बाजारात काही प्रमाणात खरेदी दिसून आली होती. सेन्सेक्सने सुरुवातीच्या घसरणीतून सावरत हिरव्या चिन्हात प्रवेश केला होता, तर निफ्टीनेही वाढ नोंदवली होती. मात्र दुपारच्या सुमारास अचानक विक्रीचा दबाव वाढल्याने दोन्ही निर्देशांक पुन्हा घसरले. दिवसअखेर सेन्सेक्स ८९३.३९ अंकांनी घसरून ७६,२००.६८ अंकांवर बंद झाला, तर निफ्टी २७८.८० अंकांच्या घसरणीसह २३,८२४.१० अंकांवर स्थिरावला.

क्षेत्रनिहाय पाहता धातू, माहिती तंत्रज्ञान आणि ग्राहक टिकाऊ वस्तू क्षेत्रातील समभागांमध्ये सर्वाधिक विक्री झाली. याशिवाय बँकिंग, वाहननिर्मिती, भांडवली वस्तू, दैनंदिन उपभोग्य वस्तू, तेल व वायू तसेच सार्वजनिक क्षेत्रातील उपक्रमांच्या समभागांवरही दबाव राहिला. दुसरीकडे औषधनिर्मिती क्षेत्रात खरेदीचे वातावरण दिसून आले. त्यामुळे औषधनिर्मिती निर्देशांक ०.९२ टक्क्यांनी वधारला, तर आरोग्यसेवा निर्देशांकात ०.६२ टक्क्यांची वाढ नोंदवली गेली.

विस्तृत बाजारातही नकारात्मक वातावरण राहिले. मध्यम आकाराच्या कंपन्यांचा निर्देशांक १.०५ टक्क्यांनी घसरला, तर लघु आकाराच्या कंपन्यांचा निर्देशांक ०.४८ टक्क्यांनी खाली आला. मुंबई शेअर बाजारात सूचीबद्ध कंपन्यांचे एकूण बाजार भांडवल सोमवारी ४७९.७२ लाख कोटी रुपये होते, ते मंगळवारी घसरून ४७५.०९ लाख कोटी रुपयांवर आले.

दिवसभरात मुंबई शेअर बाजारात ४,४४७ समभागांमध्ये व्यवहार झाले. त्यापैकी १,४९६ समभाग वाढीसह बंद झाले, तर २,७९४ समभाग घसरले. राष्ट्रीय शेअर बाजारात ३,००२ समभागांमध्ये व्यवहार झाला असून त्यातील २,१७१ समभाग तोट्यात बंद झाले.

आजच्या व्यवहारात सिप्ला, डॉक्टर रेड्डीज लॅबोरेटरीज, पॉवर ग्रिड कॉर्पोरेशन, अॅक्सिस बँक आणि सन फार्मास्युटिकल हे प्रमुख वाढणारे समभाग ठरले. तर इन्फोसिस, टाटा कन्सल्टन्सी सर्व्हिसेस, अदानी एंटरप्रायझेस, विप्रो आणि जेएसडब्ल्यू स्टील या समभागांमध्ये सर्वाधिक घसरण नोंदवली गेली. त्यामुळे बाजारातील एकूण वातावरण नकारात्मक राहिले आणि गुंतवणूकदारांना मोठा आर्थिक फटका बसला.

---------------

हिंदुस्थान समाचार / Suraj Chaugule