वॉशिंग्टन , 24 जून (हिं.स.): पश्चिम आशियात अमेरिका-इराण कराराअंतर्गत तीन महिन्यांहून अधिक काळानंतर प्रस्थापित झालेल्या शांततेवर पुन्हा संकटाचे ढग दाटू लागले आहेत. अमेरिकेचे राष्ट्राध्यक्ष डोनाल्ड ट्रम्प यांनी मंगळवारी सांगितले की, जर इराणने आंतरराष्ट्रीय अणुऊर्जा संस्था (आयएईए)ला आपल्या अणुकार्यक्रमाची तपासणी करण्याची परवानगी दिली नाही, तर ते तेहरानसोबत सुरू असलेल्या तांत्रिक चर्चांशी संबंधित बैठका रद्द करतील.

पेनसिल्व्हेनियातील लीहाय काउंटी येथे असलेल्या मॅक ट्रक्स कारखान्याच्या दौऱ्यादरम्यान पत्रकारांशी बोलताना ट्रम्प यांनी इराणच्या तपासणीविषयक भूमिकेबाबत निर्माण झालेल्या शंकांना फेटाळून लावले. संयुक्त राष्ट्रांच्या अणु निरीक्षण संस्थेच्या निरीक्षकांच्या नियुक्तीबाबत विचारलेल्या प्रश्नावर ट्रम्प म्हणाले की, इराणने तत्त्वतः यासाठी आधीच सहमती दर्शवली आहे.

डोनाल्ड ट्रम्प म्हणाले, “ते चुकीचे आहेत. त्यांना माहिती आहे की ते चुकीचे आहेत. त्यांनी आम्हाला अंतर्गत स्तरावर तसे सांगितले आहे आणि तपासणीबाबत आमच्याकडे शंभर टक्के हमी आहे. जर ते बरोबर असते, तर मी आत्ताच बैठका रद्द केल्या असत्या.” तपासणी कधी सुरू होईल, याविषयी विचारले असता ट्रम्प म्हणाले, “योग्य वेळी. कोणतीही घाई नाही, पण योग्य वेळ आल्यावर निरीक्षक तेथे उपस्थित असतील.” मात्र, इराणकडून अणुकार्यक्रमाच्या तपासणीसंदर्भात अद्याप कोणतीही अधिकृत पुष्टी करण्यात आलेली नाही.

दरम्यान, वॉशिंग्टन आणि तेहरान यांच्यात अणु तपासणी, निर्बंधांमध्ये सवलत आणि प्रादेशिक सुरक्षा व्यवस्थेसारख्या महत्त्वाच्या मुद्द्यांवर राजनैतिक चर्चा सुरू आहेत. अलीकडेच या विषयांवर स्वित्झर्लंडमध्ये दोन्ही बाजूंमध्ये चर्चा झाली होती.

---------------

हिंदुस्थान समाचार / Priyanka Bansode