नवी दिल्ली, 27 जून (हिं.स.) भारताचा स्टार भालाफेकपटू नीरज चोप्रा सप्टेंबर-ऑक्टोबरमध्ये जपानमध्ये होणाऱ्या आशियाई क्रीडा स्पर्धेत सहभागी होणार आहे. भारतीय ॲथलेटिक्स महासंघाच्या (एएफआय) निवड समितीचे अध्यक्ष आदिल सुमारीवाला यांनी याला दुजोरा दिला. दोन वेळा ऑलिम्पिक पदक विजेता असलेला हा २८ वर्षीय खेळाडू नुकताच दुखापतीतून परतला आहे

पाठीच्या दुखापतीमुळे वर्षाची सुरुवात लांबणीवर पडल्यानंतर नीरज चोप्राने या महिन्याच्या सुरुवातीला दोहा डायमंड लीगमध्ये आपल्या हंगामाची सुरुवात केली, जिथे त्याने ८५.६९ मीटरच्या सर्वोत्तम भालाफेकीसह चौथे स्थान पटकावले. ही कामगिरी राष्ट्रकुल क्रीडा स्पर्धा (८२.६१ मीटर) आणि आशियाई क्रीडा स्पर्धा (७७.८७ मीटर) या दोन्हीसाठी एएफआयच्या पात्रता मानकांची पूर्तता करणारी होती.

नीरज चोप्राने २०२३ मध्ये हांगझू येथे झालेल्या आशियाई क्रीडा स्पर्धेत ८८.८८ मीटर भालाफेकीसह पुरुषांच्या भालाफेकीत सुवर्णपदक जिंकले होते. दुखापतीमुळे तो बर्मिंगहॅम येथे होणाऱ्या २०२२ च्या राष्ट्रकुल खेळांना मुकला होता.

भुवनेश्वर येथे सुरू असलेल्या राष्ट्रीय आंतरराज्यीय वरिष्ठ ॲथलेटिक्स चॅम्पियनशिपच्या शेवटच्या दिवशी म्हणजेच रविवारी एएफआय आशियाई खेळांसाठी ॲथलेटिक्स संघाची घोषणा करेल अशी अपेक्षा आहे. ज्यामध्ये प्रत्येक वैयक्तिक ट्रॅक आणि फील्ड स्पर्धेतील दोन खेळाडूंचा समावेश असेल.

आशियाई खेळ १९ सप्टेंबर ते ४ ऑक्टोबर दरम्यान होणार आहेत. जपानमध्ये, चोप्राला श्रीलंकेच्या रोमेश थरंगाच्या नेतृत्वाखालील बलाढ्य स्पर्धकांचा सामना करावा लागण्याची शक्यता आहे. थरंगाने ९०-मीटरचा टप्पा ओलांडून आणि रोम व दोहा डायमंड लीग स्पर्धा जिंकून या हंगामात आघाडीचा भालाफेकपटू म्हणून स्वतःला सिद्ध केले आहे.पाकिस्तानचा ऑलिम्पिक चॅम्पियन अर्शद नदीम देखील आयची-नागोया २०२६ मध्ये पुरुषांच्या भालाफेक प्रकारात असू शकतो.

२३ जुलै ते २ ऑगस्ट दरम्यान ग्लासगो येथे होणाऱ्या राष्ट्रकुल खेळांमध्ये, अलीकडच्या इतिहासातील पुरुषांच्या भालाफेक प्रकारातील सर्वात चुरशीच्या स्पर्धांपैकी एक होण्याची अपेक्षा आहे. नीरज, नदीम आणि रुमेश यांच्यासोबतच, ग्रेनेडाचा दोन वेळचा विश्वविजेता अँडरसन पीटर्स आणि त्रिनिदाद आणि टोबॅगोचा विद्यमान विश्वविजेता केशॉर्न वॉलकॉट हे देखील सहभागी होण्याची शक्यता आहे.

---------------

हिंदुस्थान समाचार / वृषाली देशपांडे