पॅरिस, 28 जून (हिं.स.)।फ्रान्सच्या आरोग्य अधिकाऱ्यांनी रविवारी सांगितले की, विक्रमी उष्णतेच्या लाटेदरम्यान देशात अपेक्षेपेक्षा सुमारे 1,000 अधिक मृत्यूंची नोंद झाली आहे. गेल्या काही दिवसांपासून पश्चिम युरोपातील अनेक भाग तीव्र उष्णतेच्या विळख्यात सापडले आहेत.

पब्लिक हेल्थ फ्रान्सने प्रसिद्ध केलेल्या निवेदनात म्हटले आहे की, 24 जूनपासून मागील काही महिन्यांतील सरासरी मृत्यूंच्या तुलनेत सुमारे 1,000 अतिरिक्त मृत्यूंची नोंद झाली आहे.

संस्थेच्या माहितीनुसार, रेड अलर्ट घोषित करण्यात आलेल्या भागांमध्ये मृत्यूंचे प्रमाण सर्वाधिक होते. मृतांपैकी 85 टक्के नागरिकांचे वय 65 वर्षे किंवा त्याहून अधिक होते. तसेच, सर्वाधिक वाढ घरामध्ये मृत्यू झालेल्या व्यक्तींच्या संख्येत दिसून आली. विशेषतः इले-द-फ्रान्स या प्रदेशात, ज्यामध्ये पॅरिस आणि आसपासच्या परिसराचा समावेश होतो, मृत्यूंचे प्रमाण अधिक आढळले.

निवेदनात पुढे म्हटले आहे की, “एकटे राहणारे किंवा सामाजिकदृष्ट्या एकाकी जीवन जगणारे नागरिक, विशेषतः दाट लोकवस्तीच्या शहरी भागांतील लोक, यांच्याप्रती समाजाने अधिक संवेदनशीलता दाखवणे आणि त्यांना मदतीचा हात देणे आवश्यक आहे.”संस्थेने स्पष्ट केले की, हे आकडे प्राथमिक स्वरूपाचे असून प्रत्यक्ष मृत्यूंची संख्या यापेक्षाही अधिक असण्याची शक्यता नाकारता येत नाही.

सलग अनेक दिवस भीषण उष्णतेचा सामना केल्यानंतर आणि अनेक भागांमध्ये तापमान 40 अंश सेल्सियसपेक्षा अधिक नोंदवल्यानंतर, रविवारी संपूर्ण फ्रान्समध्ये उष्णतेपासून काहीसा दिलासा मिळाला.

---------------

हिंदुस्थान समाचार / Priyanka Bansode