वॉशिंग्टन , 29 जून (हिं.स.)।अमेरिका आणि इराण यांच्यात झालेल्या तीव्र प्रत्युत्तरात्मक हल्ल्यांनंतर दोन्ही देशांनी एकमेकांविरुद्धची लष्करी कारवाई थांबवण्याचा निर्णय घेतला आहे. गेल्या काही दिवसांतील हल्ल्यांमुळे नुकत्याच झालेल्या नाजूक युद्धविरामावर संकट निर्माण झाले होते. मात्र, तणाव कमी करण्याच्या उद्देशाने दोन्ही देश मंगळवारी कतारमध्ये पुन्हा चर्चेच्या टेबलावर येण्यास तयार झाले आहेत.

एका वरिष्ठ अमेरिकन अधिकाऱ्याच्या माहितीनुसार, अमेरिका आणि इराण यांनी परस्परांवरील हल्ले थांबवण्यास सहमती दर्शवली आहे. गेल्या काही दिवसांपासून सुरू असलेल्या प्रत्युत्तरात्मक हल्ल्यांमुळे दोन्ही देशांमधील अत्यंत नाजूक युद्धविराम मोडण्याच्या उंबरठ्यावर पोहोचला होता. या पार्श्वभूमीवर हा निर्णय घेण्यात आला आहे.अधिकाऱ्यांच्या माहितीनुसार, मंगळवारी कतारची राजधानी दोहा येथे दोन्ही देशांदरम्यान महत्त्वाची तांत्रिक स्तरावरील बैठक होणार आहे. या बैठकीचा मुख्य अजेंडा म्हणजे सामरिकदृष्ट्या अत्यंत महत्त्वाच्या होर्मुझ सामुद्रधुनीवरील वाद सोडवणे हा आहे. विशेषतः युद्धविराम करारातील विविध तरतुदींच्या वेगवेगळ्या अर्थांवर चर्चा होणार असून, या जलमार्गातून व्यापारी जहाजांची सुरक्षित वाहतूक कशी सुनिश्चित करायची, यावर भर दिला जाणार आहे.

बगदादमध्ये बोलताना इराणचे परराष्ट्रमंत्री अब्बास अराघची यांनी अमेरिकेवर अंतरिम सामंजस्य कराराचे उल्लंघन केल्याचा आरोप केला आहे. त्यांच्या म्हणण्यानुसार, अमेरिका होर्मुझ सामुद्रधुनीतून पर्यायी जहाजवाहतूक मार्ग तयार करण्याचा प्रयत्न करत असून, तो कराराच्या अटींच्या विरोधात आहे. हा वाद तेव्हा अधिक तीव्र झाला होता, जेव्हा इराणने ओमानच्या किनाऱ्याजवळून जाणाऱ्या एका जहाजावर हल्ला केला होता.

---------------

हिंदुस्थान समाचार / Priyanka Bansode