डब्लिन, 29 जून (हिं.स.) । भारताविरुद्ध ऐतिहासिक टी-२० आंतरराष्ट्रीय मालिका विजय मिळवून दिल्यानंतर अवघ्या एका दिवसात, आयर्लंड क्रिकेट संघाचे मुख्य प्रशिक्षक हेनरिक मलान यांनी आपल्या पदाचा तात्काळ राजीनामा दिला आहे. त्यांची नियुक्ती २०२७ च्या सुरुवातीपर्यंत होती, पण नवीन विश्वचषक चक्रासाठी संघाला तयार करण्याकरिता त्यांनी पद सोडण्याचा निर्णय घेतला.

जानेवारी २०२२ मध्ये आयर्लंड पुरुष संघाच्या मुख्य प्रशिक्षकपदी त्यांची नियुक्ती करण्यात आली होती. नंतर त्यांचा करार २०२४ पर्यंत वाढवण्यात आला. त्यांच्या कार्यकाळात, आयर्लंडने सलग तीन टी-२० विश्वचषकांसाठी (२०२२, २०२४ आणि २०२६) पात्रता मिळवली. मलान यांच्या नेतृत्वाखाली, आयर्लंडने २०२२ च्या टी-२० विश्वचषकात मेलबर्न येथे इंग्लंडला पराभूत करून एक मोठा उलटफेर घडवला. इतकेच नाही, तर त्यांच्या कार्यकाळात संघाने आपल्या इतिहासातील तिन्ही कसोटी सामनेही जिंकले.

राजीनामा दिल्यानंतर, मलान म्हणाले की आयर्लंड क्रिकेटशी जोडले जाणे हा एक सन्मान होता आणि तेथील काळ ते नेहमीच स्मरणात ठेवतील. त्यांनी सांगितले की इंग्लंडवरील विश्वचषक विजय, अफगाणिस्तानविरुद्धचा पहिला कसोटी विजय, झिम्बाब्वेविरुद्ध मायदेशातील कसोटी विजय, भारताविरुद्धचा ऐतिहासिक टी-२० मालिका विजय आणि पाकिस्तान, वेस्ट इंडिज व दक्षिण आफ्रिका यांसारख्या संघांविरुद्धचे यश हे त्यांच्या कारकिर्दीतील संस्मरणीय यश असेल.

आयर्लंडने दुसऱ्या टी-२० सामन्यात भारताला एका धावेने पराभूत करून मालिका २-० ने जिंकली. कोणत्याही फॉरमॅटमध्ये भारताविरुद्ध द्विपक्षीय मालिका जिंकण्याची आयर्लंडची ही पहिलीच वेळ होती. आयर्लंड आता ऑगस्टमध्ये मायदेशात अफगाणिस्तानविरुद्ध पाच एकदिवसीय सामन्यांची मालिका खेळणार आहे.

---------------

हिंदुस्थान समाचार / वृषाली देशपांडे