बंगळुरू, 03 जून (हिं.स.)।कर्नाटकच्या राजकारणात आज एका नव्या पर्वाची सुरुवात झाली. काँग्रेसचे ज्येष्ठ नेते आणि दक्षिण भारतातील पक्षाचे ‘संकटमोचक’ मानले जाणारे डी. के. शिवकुमार यांनी आज कर्नाटकच्या मुख्यमंत्रीपदाची शपथ घेतली तर काँग्रेसचे ज्येष्ठ नेते जी. परमेश्वर यांनी उपमुख्यमंत्रीपदाची शपथ घेतली. बंगळुरू येथील लोक भवनमधील भव्य ग्लास हाऊसमध्ये आयोजित समारंभात राज्यपाल थावरचंद गहलोत यांनी दोन्ही नेत्यांना पद आणि गोपनीयतेची शपथ दिली.

सिद्धरामय्या यांनी २८ मे रोजी मुख्यमंत्रीपदाचा राजीनामा दिला होता. त्यानंतर ३० मे रोजी बंगळुरूमध्ये काँग्रेस विधिमंडळ पक्षाची बैठक झाली. या बैठकीत डी. के. शिवकुमार यांची विधिमंडळ पक्षनेते म्हणून निवड करण्यात आली. सिद्धरामय्या यांनीच त्यांच्या नावाचा प्रस्ताव मांडला होता. तो सर्वसंमतीने मंजूर करण्यात आला आणि त्यानंतर आज शिवकुमार यांनी मुख्यमंत्री म्हणून शपथ घेतली. या समारंभाला काँग्रेसचे अनेक वरिष्ठ नेते, पक्ष पदाधिकारी आणि मोठ्या संख्येने समर्थक उपस्थित होते. मुख्यमंत्री आणि उपमुख्यमंत्री यांच्यासह मंत्रिमंडळ विस्तारांतर्गत आणखी १२ नेत्यांनी मंत्रीपदाची शपथ घेतली. यामध्ये माजी मुख्यमंत्री सिद्धरामय्या यांचे पुत्र डॉ. यतींद्र सिद्धरामय्या यांचाही समावेश आहे.

याशिवाय काँग्रेस नेते के. एच. मुनियप्पा यांनी डी. के. शिवकुमार यांच्या मंत्रिमंडळात मंत्रीपदाची शपथ घेतली. के. जे. जॉर्ज यांनी कर्नाटकचे मंत्री म्हणून शपथ घेतली.एम. बी. पाटील आणि रामलिंगा रेड्डी यांनी मंत्रीपदाची शपथ घेतली. काँग्रेस आमदार सतीश जारकीहोळी, कृष्णा बायरे गौडा, प्रियांक खरगे आणि यू. टी. खादर यांनी कर्नाटकचे मंत्री म्हणून शपथ घेतली. ईश्वर खंड्रे, यतींद्र सिद्धरामय्या, बिरीथी सुरेश आणि डॉ. शरणप्रकाश पाटील यांनीही मंत्रीपदाची शपथ घेतली.

डी. के. शिवकुमार यांनी आपल्या राजकीय कारकिर्दीची सुरुवात १९८० च्या दशकाच्या प्रारंभी विद्यार्थी नेता म्हणून केली. १९७९ मध्ये देवराज उर्स आणि त्यांच्या समर्थकांनी काँग्रेस पक्ष सोडल्यानंतर शिवकुमार यांनी विद्यार्थी नेता म्हणून काँग्रेसमध्ये आपली ओळख निर्माण केली आणि पक्षात आपले स्थान मजबूत केले.

१९८५ मध्ये पहिल्या विधानसभा निवडणुकीपूर्वी काँग्रेस समर्थित विद्यार्थी संघटना एनएसयूआयने त्यांना विद्यार्थी निवडणुकीसाठी उमेदवारी देण्यास नकार दिला होता. त्याच काळात भाजप नेते अनंत कुमार यांनी त्यांना अखिल भारतीय विद्यार्थी परिषद (एबीव्हीपी) मध्ये सहभागी होण्याचा प्रयत्न केला होता, मात्र तो यशस्वी ठरला नाही.

शिवकुमार यांनी १९८५ मध्ये साठनूर मतदारसंघातून ज्येष्ठ नेते एच. डी. देवेगौडा यांच्या विरोधात पहिली विधानसभा निवडणूक लढवली होती, मात्र त्यांना पराभव स्वीकारावा लागला. त्यानंतर १९८९ मध्ये अवघ्या २७ व्या वर्षी त्यांनी म्हैसूर जिल्ह्यातील साठनूर मतदारसंघातून पहिला विजय मिळवत आमदारपद पटकावले.

---------------

हिंदुस्थान समाचार / Priyanka Bansode