जळगाव, 04 जून, (हिं.स.)जळगाव शहरात एका महाविद्यालयीन तरुणीशी संबंधित गंभीर प्रकरण समोर आले असून, तिच्या तक्रारीनंतर तिघांविरुद्ध पोक्सोसह विविध गंभीर कलमांखाली गुन्हा नोंदविण्यात आला आहे. या प्रकरणात एका तरुणीच्या मैत्रिणीने तिला व्यसनांच्या आहारी नेण्यास मदत केल्याचा, तसेच एका तरुणाने तिचा गैरफायदा घेत ब्लॅकमेल करून वारंवार अत्याचार केल्याचा आरोप करण्यात आला आहे.

ळगावच्या रामानंद नगर पोलीस ठाण्यात दाखल झालेल्या तक्रारीनुसार, पीडित तरुणी आणि तिची मैत्रीण शालेय जीवनापासून एकमेकींच्या परिचित होत्या. काही काळानंतर मैत्रिणीच्या माध्यमातून पीडितेचा काही तरुणांशी संपर्क आला. पीडितेने तक्रारीत नमूद केल्याप्रमाणे, सुरुवातीला तिला सिगारेटचे व्यसन लावण्यात आले आणि नंतर दारू व अमली पदार्थांच्या सेवनाकडे वळविण्यात आले. त्यानंतर एका आरोपीने पीडितेला वेगवेगळ्या ठिकाणी नेऊन तिच्याशी जबरदस्तीने शारीरिक संबंध प्रस्थापित केल्याचा आरोप आहे. याच दरम्यान तिचे काही खाजगी फोटो काढण्यात आले. हे फोटो सोशल मीडियावर प्रसारित करण्याची धमकी देत तिच्यावर वारंवार दबाव टाकण्यात आल्याचे तक्रारीत म्हटले आहे.

पीडितेच्या म्हणण्यानुसार, आरोपीने तिला काही काळ स्वतःच्या ताब्यात ठेवले होते. पुढे तिने त्याच्याशी संबंध ठेवण्यास नकार दिल्यानंतर त्याच्या ओळखीतील आणखी एका व्यक्तीने सोशल मीडियाच्या माध्यमातून अश्लील संदेश पाठवून त्रास दिल्याचा आरोप करण्यात आला आहे. तसेच तिसऱ्या आरोपीवर अमली पदार्थ पुरवल्याचा संशय व्यक्त करण्यात आला आहे. या सर्व घटनांबाबत पीडितेने आपल्या वडिलांच्या उपस्थितीत पोलिसांकडे तक्रार दिली. त्यानुसार निर्मल तिवारी, जय चौधरी आणि गौरव पुरोहित या तिघांविरुद्ध पोक्सो कायद्यासह विविध गंभीर कलमांखाली गुन्हा दाखल करण्यात आला असून पुढील तपास रामानंद नगर पोलीस करत आहेत.

---------------

हिंदुस्थान समाचार / मनोहर कांडेकर