नवी दिल्ली, 08 जून (हिं.स.)।पश्चिम आशिया आणि खाडी प्रदेशातील तणाव वाढल्यानंतर भारताने सोमवारी पुन्हा एकदा संघर्ष तातडीने कमी करण्याचे तसेच संवादाच्या माध्यमातून तोडगा काढून या प्रदेशात शांतता आणि स्थैर्य प्रस्थापित करण्याचे आवाहन केले आहे. परराष्ट्र मंत्रालयाने म्हटले आहे की, 100 दिवसांहून अधिक काळ सुरू असलेल्या या संघर्षामुळे मोठ्या प्रमाणावर मानवी हालअपेष्टा निर्माण झाल्या असून जागतिक अर्थव्यवस्थेवरही त्याचा विपरीत परिणाम झाला आहे.

परराष्ट्र मंत्रालयाच्या निवेदनात म्हटले आहे की, पश्चिम आशियात पुन्हा सुरू झालेल्या हल्ल्यांबद्दल भारताला तीव्र खेद आहे. या घडामोडी संपूर्ण आंतरराष्ट्रीय समुदायासाठी गंभीर चिंतेचा विषय आहेत. हा संघर्ष आता 100 दिवसांहून अधिक काळ सुरू असून त्यामुळे आधीच मोठ्या प्रमाणावर मानवी दुःख आणि नुकसान झाले आहे. तसेच जागतिक अर्थव्यवस्था आणि ऊर्जा पुरवठा व्यवस्थेवरही त्याचा नकारात्मक परिणाम झाला आहे.

निवेदनात पुढे म्हटले आहे की, भारत सर्व संबंधित पक्षांना तात्काळ तणाव कमी करण्याचे, सामान्य नागरिकांचे संरक्षण सुनिश्चित करण्याचे आणि शांततापूर्ण तोडगा काढण्यासाठी सुरू असलेल्या चर्चेला यशस्वीपणे पूर्णत्वास नेण्याचे आवाहन करतो, जेणेकरून या प्रदेशात पुन्हा शांतता आणि स्थैर्य प्रस्थापित होऊ शकेल.

शांतता पुनर्स्थापित करण्यासाठी नवी दिल्लीकडून करण्यात आलेले हे आवाहन गेल्या 24 तासांत वाढलेल्या लष्करी तणावाच्या पार्श्वभूमीवर आले आहे. या काळात अनेक शहरांमध्ये लष्करी चकमकी, धोरणात्मक ठिकाणांवरील हवाई हल्ले आणि संपूर्ण प्रदेशात तीव्र गोळीबाराच्या घटना घडल्या आहेत.

पश्चिम आशियातील तणावात मोठी वाढ झालेल्या परिस्थितीत, इस्रायल आणि इराण यांनी सोमवारी एकमेकांवर हल्ले केल्याचे वृत्त आहे. त्यामुळे आधीच नाजूक स्थितीत असलेला युद्धविराम गंभीर धोक्यात आला असून संपूर्ण प्रदेशात व्यापक युद्ध भडकण्याची शक्यता निर्माण झाली आहे.

---------------

हिंदुस्थान समाचार / Priyanka Bansode