रायगड, 08 जून (हिं.स.)। वाहतूक नियमांचे उल्लंघन करणाऱ्यांविरोधात रायगड जिल्हा पोलिसांच्या वाहतूक शाखेने विशेष मोहीम राबवत मोठी कारवाई केली आहे. दिनांक ७ जून २०२६ रोजी जिल्ह्यातील २८ पोलीस ठाण्यांच्या हद्दीत वाहतूक शाखेचे अधिकारी व कर्मचाऱ्यांनी संयुक्तपणे तपासणी मोहीम राबवून नियमभंग करणाऱ्या वाहनचालकांवर कारवाई केली.

या मोहिमेदरम्यान वाहतुकीचे विविध नियम मोडणाऱ्या एकूण ३६६ वाहनचालकांवर कायदेशीर कारवाई करण्यात आली. तसेच संबंधितांकडून ३ लाख ५९ हजार ७०० रुपयांचा दंड वसूल करण्यात आला आहे.

विनाहेल्मेट वाहन चालविणे, सीटबेल्टचा वापर न करणे, सिग्नलचे उल्लंघन, चुकीच्या पद्धतीने वाहन चालविणे तसेच इतर वाहतूक नियमांचा भंग करणाऱ्या वाहनचालकांवर ही कारवाई करण्यात आल्याची माहिती पोलिसांनी दिली.

वाहतूक नियमांचे पालन केल्यास अपघातांचे प्रमाण कमी होण्यास मदत होते. त्यामुळे नागरिकांनी स्वतःच्या आणि इतरांच्या सुरक्षेच्या दृष्टीने वाहतूक नियमांचे काटेकोर पालन करावे, असे आवाहन वाहतूक शाखेकडून करण्यात आले आहे.

---------------

हिंदुस्थान समाचार / संदेश साळुंके (रायगड)