मुंबई, 08 जून (हिं.स.) यशराज फिल्म्सच्या बहुप्रतिक्षित स्पाय युनिव्हर्स चित्रपट 'अल्फा'चा टीझर १० जून रोजी प्रदर्शित होणार आहे. आलिया भट्ट आणि शर्वरी यांची प्रमुख भूमिका असलेल्या या चित्रपटाच्या पहिल्या लूकमध्ये, एक धोकादायक मारेकरी बनण्यासाठी तयार होणाऱ्या एका तरुणीची मूळ कथा सादर केली जाईल. वायआरएफ स्पाय युनिव्हर्समधील हा पहिला चित्रपट आहे, जो एका महिला मारेकऱ्याचा प्रवास दाखवतो. 'द रेल्वे मॅन' फेम शिव रावेल यांनी या चित्रपटाचे दिग्दर्शन केले आहे.

सूत्रांनुसार, टीझरच्या प्रदर्शनासोबतच चित्रपटासाठी एक मोठी मार्केटिंग आणि प्रमोशनल मोहीम सुरू होणार आहे. या मोहिमेचा भर केवळ चित्रपटावरच नाही, तर 'अल्फा' या नावाशी निगडित तत्त्वज्ञान आणि दृष्टिकोनावरही असेल. मिळालेल्या माहितीनुसार, आदित्य चोप्रा आणि त्यांच्या टीमने एक बहुआयामी रणनीती आखली आहे, ज्याद्वारे डिजिटल मोहिमा, युवा-संबंधित कार्यक्रम आणि देशभरातील विविध उपक्रमांच्या माध्यमातून आधुनिक भारतातील आत्मविश्वासू आणि स्पष्टवक्त्या तरुण पिढीचा गौरव केला जाईल.

सूत्रांनी दिलेल्या माहितीनुसार, चित्रपटाच्या प्रसिद्धी मोहिमेत विशेषतः महिला सक्षमीकरण आणि आत्मनिर्भरतेच्या कल्पनेवर भर दिला जाईल. 'अल्फा' हे स्वतःचे भविष्य घडवण्याच्या आणि सामाजिक बंधनांना आव्हान देण्याच्या वृत्तीचे प्रतीक म्हणून सादर केले जाईल. या चित्रपटात आलिया भट्ट आणि शर्वरी यांच्यासोबत बॉबी देओल आणि अनिल कपूर यांच्या प्रमुख भूमिका आहेत. वायआरएफचा हा मेगा-बजेट ॲक्शन थ्रिलर या वर्षातील सर्वाधिक अपेक्षित चित्रपटांपैकी एक मानला जात आहे.

---------------

हिंदुस्थान समाचार / Suraj Chaugule