-जूनमध्ये आयात-निर्यातीतील तफावत वाढल्याने व्यापार तूट 30.43 अब्ज डॉलर

नवी दिल्ली, 13 जुलै (हिं.स.)। देशाची वस्तू निर्यात जूनमध्ये वार्षिक आधारावर 15.5 टक्क्यांनी वाढून 40.41 अब्ज डॉलरवर पोहोचली, जी मागील वर्षी जून 2025 मध्ये 34.98 अब्ज डॉलर होती. याच कालावधीत आयात सुमारे 31 टक्क्यांनी वाढून 70.84 अब्ज डॉलरवर पोहोचली. त्यामुळे जून महिन्यात व्यापार तूट वाढून 30.43 अब्ज डॉलर झाली.

वाणिज्य आणि उद्योग मंत्रालयाने सोमवारी जारी केलेल्या आकडेवारीनुसार, कच्चे तेल (क्रूड ऑईल) आणि मौल्यवान धातूंच्या जागतिक किमतींमध्ये झालेल्या वाढीमुळे आयातीत निर्यातीच्या तुलनेत अधिक वाढ नोंदवली गेली. आयातीत 31 टक्क्यांची वाढ झाल्यामुळे ती 70.84 अब्ज डॉलरवर पोहोचली, तर मागील वर्षी जूनमध्ये ती 54.08 अब्ज डॉलर होती. यामुळे व्यापार तूट जून 2025 मधील 19.10 अब्ज डॉलरवरून सुमारे 59 टक्क्यांनी वाढून 30.43 अब्ज डॉलरवर पोहोचली.

मंत्रालयाच्या माहितीनुसार, चालू आर्थिक वर्ष 2026-27 च्या (एप्रिल-जून) पहिल्या तिमाहीत निर्यात 15.92 टक्क्यांनी वाढून 129.32 अब्ज डॉलर झाली, तर आयात 19.89 टक्क्यांनी वाढून 216.18 अब्ज डॉलरवर पोहोचली. चालू आर्थिक वर्षाच्या पहिल्या तिमाहीत सोन्याची आयात वाढून 11.01 अब्ज डॉलर झाली, जी मागील वर्षी एप्रिल-जूनमध्ये 7.49 अब्ज डॉलर होती.

वाणिज्य सचिव राजेश अग्रवाल यांनी पत्रकारांना सांगितले की, जूनमध्ये पश्चिम आशियाई देशांकडे भारताची निर्यात 7.29 टक्क्यांनी वाढून 5 अब्ज डॉलर झाली. अग्रवाल यांनी सांगितले की, कच्चे तेल, इलेक्ट्रॉनिक्स, यंत्रसामग्री आणि मौल्यवान धातूंच्या आयातीत वाढ झाल्यामुळे एकूण आयात वाढली आहे.

---------------

हिंदुस्थान समाचार / Suraj Chaugule