मुंबई, 13 जुलै (हिं.स.)। अभिनेता सलमान खानच्या बहुप्रतीक्षित 'मातृभूमी: मे वॉर रेस्ट इन पीस' या चित्रपटाच्या प्रदर्शनाबाबत अद्यापही अनिश्चितता कायम आहे. सुरुवातीला हा चित्रपट ऑगस्टमध्ये चित्रपटगृहांत प्रदर्शित करण्याची योजना होती, मात्र आता तो यंदाच्या वर्षात प्रदर्शित होण्याची शक्यता अत्यंत कमी दिसत आहे. वृत्तांनुसार, चित्रपटाशी संबंधित काही प्रलंबित मुद्द्यांमुळे त्याचे प्रदर्शन सातत्याने पुढे ढकलले जात आहे.

वृत्तानुसार, चित्रपट प्रदर्शित करण्याचे प्रयत्न सुरू आहेत, मात्र सध्याच्या समस्या लवकर सुटल्या नाहीत तर त्याचे प्रदर्शन 2027 पर्यंत पुढे ढकलले जाऊ शकते. सूत्रांच्या माहितीनुसार, वाद लवकर मिटला तरीही योग्य प्रदर्शनाची तारीख मिळणे सोपे नसेल, कारण बहुतांश महत्त्वाच्या तारखा आधीच निश्चित झालेल्या आहेत. सलमान खान कोणत्याही अन्य मोठ्या चित्रपटाशी बॉक्स ऑफिसवर टक्कर टाळण्यास प्राधान्य देतो आणि त्यामुळे घाईघाईने प्रदर्शनाचा निर्णय घेतला जाणार नाही.

वृत्तात असा दावाही करण्यात आला आहे की, 'मातृभूमी'चे प्रदर्शन पुढील वर्षापर्यंत लांबले तर 2027 मध्ये सलमान खानचे दोन मोठे चित्रपट प्रदर्शित होऊ शकतात. त्यांचा दुसरा 'एसव्हीसी63' हा चित्रपट, ज्यामध्ये अभिनेत्री नयनतारा देखील झळकणार आहेत, तो ईद 2027 च्या निमित्ताने प्रदर्शित होणार असल्याचे सांगितले जात आहे.

अपूर्व लाखिया दिग्दर्शित 'मातृभूमी: मे वॉर रेस्ट इन पीस' हा चित्रपट 2020 मध्ये भारत आणि चीन यांच्यात झालेल्या गलवान खोरे संघर्षाच्या पार्श्वभूमीवर आधारित आहे. चित्रपटाच्या विषयवस्तूबाबत उपस्थित झालेल्या आक्षेपांमुळे त्याला अद्याप केंद्रीय चित्रपट प्रमाणन मंडळ (सीबीएफसी) कडून अंतिम प्रमाणपत्र मिळालेले नाही, असे सांगितले जात आहे. त्यामुळे सेन्सॉर प्रक्रिया पूर्ण झाल्यानंतरच चित्रपटाच्या प्रदर्शनाबाबत अंतिम निर्णय घेतला जाणार आहे.

---------------

हिंदुस्थान समाचार / Suraj Chaugule