मुंबई, 13 जुलै (हिं.स.)। प्राइम व्हिडिओच्या आगामी कॉमेडी-ड्रामा मालिकेचा 'आदर्श बाल विद्यालय'चा ट्रेलर प्रदर्शित करण्यात आला आहे. ट्रेलरमध्ये एका सरकारी शाळेची रंजक आणि भावनिक कथा दाखवण्यात आली आहे, ज्यामध्ये विनोद, आव्हाने आणि प्रेरणेचा अनोखा संगम पाहायला मिळतो. या मालिकेत अभिनेते केके मेनन हे ज्ञानेश्वर त्रिपाठी या दिलखुलास मुख्याध्यापकाच्या भूमिकेत दिसणार आहेत, जे आपल्या शाळेचे चित्र पालटण्याचे स्वप्न पाहतात.

ट्रेलरमध्ये दाखवण्यात आले आहे की, दिल्लीतील सर्वोत्तम मुख्याध्यापकांसाठी आयोजित केम्ब्रिज प्रशिक्षण कार्यक्रमाची माहिती मिळाल्यानंतर ज्ञानेश्वर त्रिपाठी आपल्या दुर्लक्षित सरकारी शाळेत बदल घडवून आणण्याचा संकल्प करतात. त्यानंतर शाळेत घडणारे मजेशीर प्रसंग, खोडकर मुलांची धमाल आणि भावनिक क्षण यांमुळे कथा अधिक रंजक बनते.

सात भागांची ही मालिका 24 जुलैपासून प्राइम व्हिडिओवर स्ट्रीम होणार आहे. या मालिकेचे दिग्दर्शन हिमांक गौर यांनी केले असून, कथा बिस्वपती सरकार आणि अक्षय अस्थाना यांनी लिहिली आहे. दिग्दर्शकांच्या मते, या मालिकेची कथा शालेय जीवनातील वास्तविक आठवणी आणि अनुभवांपासून प्रेरित असल्याने प्रेक्षकांना तिच्याशी सहजपणे जोडले जाईल.

---------------

हिंदुस्थान समाचार / Suraj Chaugule