पणजी, 14 जुलै (हिं.स.)। भारत सरकारच्या २०४७ पर्यंत सर्वांसाठी विमा या उद्दिष्टाला बळकटी देत, गोव्यासाठी अग्रणी जीवन विमा कंपनी असलेल्या स्टार युनियन डाय-इची लाइफ इन्शुरन्सने (SUD Life) आर्थिक वर्ष २०२६-२७ च्या पहिल्या तिमाहीत राज्यभर व्यापक विमा जनजागृती मोहीम राबवली. या मोहिमेद्वारे गोव्यातील ३,००० हून अधिक नागरिकांपर्यंत पोहोच साधण्यात आली.
या मोहिमेअंतर्गत उत्तर आणि दक्षिण गोव्यात २५ ग्रामपंचायत परिसंवाद, २५ बाजारपेठांमधील उपक्रम आणि मोफत आरोग्य तपासणी शिबिरांचे आयोजन करण्यात आले होते. ग्रामीण व निमशहरी भागांत आर्थिक साक्षरता वाढवणे आणि 'प्रधानमंत्री जीवन ज्योती विमा योजना' (PMJJBY) यांसारख्या सामाजिक सुरक्षा योजनांना प्रोत्साहन देणे हा यामागचा मुख्य उद्देश होता. स्थानिक भाषेतील माहिती पत्रके, संवादात्मक खेळ आणि प्रश्नमंजुषा यांच्या माध्यमातून नागरिकांना विम्याचे महत्त्व सोप्या भाषेत समजावून सांगण्यात आले.
कंपनीचे व्यवस्थापकीय संचालक आणि मुख्य कार्यकारी अधिकारी (MD & CEO) अभय तीवारी म्हणाले की, आर्थिक साक्षरतेसोबत आरोग्य उपक्रमांची सांगड घालून आम्ही नागरिकांना योग्य निर्णय घेण्यास सक्षम करत आहोत, जेणेकरून प्रत्येक कुटुंबाला आर्थिक सुरक्षिततेचा लाभ मिळेल.
---------------
हिंदुस्थान समाचार / Suraj Chaugule
