नवी दिल्ली, 14 जुलै (हिं.स.)। पश्चिम आशियातील युद्धविराम संपल्यानंतर वाढलेला तणाव, आंतरराष्ट्रीय बाजारात कच्च्या तेलाच्या किमतीत झालेली मोठी वाढ आणि डॉलरच्या तुलनेत रुपयाच्या मूल्यात झालेली घसरण यामुळे भारतीय शेअर बाजारात मंगळवारी नकारात्मक वातावरण राहिले. दिवसभराच्या व्यवहारानंतर सेन्सेक्स 0.72 टक्के आणि निफ्टी 0.66 टक्क्यांच्या घसरणीसह बंद झाले. बाजारातील या घसरणीमुळे गुंतवणूकदारांच्या संपत्तीत तब्बल 2.20 लाख कोटी रुपयांची घट झाली.

मंगळवारी बाजाराची सुरुवातही घसरणीसह झाली होती. सुरुवातीच्या काही मिनिटांत खरेदीचा आधार मिळाल्याने सेन्सेक्स आणि निफ्टीमध्ये थोडी सुधारणा दिसून आली. मात्र त्यानंतर विक्रीचा दबाव वाढला आणि बाजाराची दिशा पुन्हा खाली आली. दिवसभर खरेदीदारांनी बाजाराला आधार देण्याचा प्रयत्न केला, पण मोठ्या प्रमाणात झालेल्या विक्रीमुळे त्याचा फारसा परिणाम झाला नाही.

मुंबई शेअर बाजाराचा सेन्सेक्स 344.06 अंकांच्या घसरणीसह 77,272.34 अंकांवर उघडला. सुरुवातीच्या दहा मिनिटांत तो जवळपास 130 अंकांनी सुधारून 77,402.79 अंकांवर पोहोचला. मात्र त्यानंतर विक्रीचा जोर वाढल्याने सेन्सेक्समध्ये सातत्याने घसरण झाली. दिवसअखेर सेन्सेक्स 561.46 अंकांनी घसरून 77,054.94 अंकांवर बंद झाला. राष्ट्रीय शेअर बाजाराचा निफ्टी देखील 143 अंकांच्या घसरणीसह 24,068 अंकांवर सुरू झाला. सुरुवातीला तो 24,157.10 अंकांपर्यंत वर गेला होता. मात्र नंतर झालेल्या जोरदार विक्रीमुळे निफ्टी खाली घसरला. व्यवहाराच्या शेवटी निफ्टी 158.95 अंकांच्या घसरणीसह 24,052.05 अंकांवर बंद झाला.

आज बहुतांश क्षेत्रांमध्ये विक्रीचा दबाव दिसून आला. रिअल्टी, बँकिंग आणि माहिती तंत्रज्ञान क्षेत्रातील शेअर्समध्ये मोठी घसरण झाली. तसेच एफएमसीजी, तेल आणि वायू, मीडिया, पायाभूत सुविधा, ऊर्जा आणि ग्राहक टिकाऊ वस्तू क्षेत्रातील निर्देशांकही घसरणीसह बंद झाले. दुसरीकडे औषधनिर्माण आणि धातू क्षेत्रातील शेअर्समध्ये खरेदी दिसून आली. बीएसईवर नोंदणीकृत कंपन्यांचे एकूण बाजार भांडवल सोमवारी 481.60 लाख कोटी रुपये होते. मंगळवारी व्यवहार संपल्यानंतर ते 479.40 लाख कोटी रुपयांवर आले. त्यामुळे गुंतवणूकदारांना सुमारे 2.20 लाख कोटी रुपयांचा तोटा सहन करावा लागला.

दिवसभराच्या व्यवहारात बीएसईवर 4,433 शेअर्समध्ये खरेदी-विक्री झाली. त्यापैकी 1,501 शेअर्स वाढीसह बंद झाले, तर 2,737 शेअर्स घसरणीसह बंद झाले. सेन्सेक्समधील 30 पैकी 24 शेअर्स घसरले, तर केवळ 6 शेअर्समध्ये वाढ झाली.मोठ्या कंपन्यांमध्ये भारती एअरटेल, अपोलो हॉस्पिटल्स, सन फार्मास्युटिकल्स, डॉ. रेड्डीज लॅबोरेटरीज आणि टीसीएस हे वाढ नोंदवणारे प्रमुख शेअर्स ठरले. तर एचसीएल टेक्नॉलॉजी, श्रीराम फायनान्स, एचडीएफसी लाइफ, टीएमपीव्ही आणि इंटरग्लोब एव्हिएशन या कंपन्यांच्या शेअर्समध्ये मोठी घसरण झाली.

---------------

हिंदुस्थान समाचार / Suraj Chaugule