लंडन, 15 जुलै (हिं.स.)अक्षर पटेलच्या अष्टपैलू कामगिरीच्या आणि कर्णधार शुभमन गिलच्या शानदार खेळीच्या जोरावर भारताने पहिल्या एकदिवसीय सामन्यात इंग्लंडला सहा गडी राखून पराभूत केले. भारताने इंग्लंडचे २५९ धावांचे लक्ष्य ४५.२ षटकांत चार गडी गमावून पूर्ण केले. यासह भारताने तीन सामन्यांच्या मालिकेत १-० अशी आघाडी घेतली. गिल ८० धावांवर दुखापतग्रस्त होऊन निवृत्त झाला, तर वॉशिंग्टन सुंदरने नाबाद ५२ आणि अक्षर पटेलने नाबाद ५७ धावा केल्या. रोहित शर्मा आणि विराट कोहली पुनरागमनाच्या सामन्यात अपयशी ठरले. रोहितने 11 धावा आणि कोहलीने पाच धावा केल्या. अक्षर पटेलने ६२ धावांत चार बळी घेत आणि नंतर अर्धशतक झळकावत सामनावीर पुरस्कार पटकावला.
तत्पूर्वी, भारतीय वेगवान गोलंदाजांनी दिलेल्या सुरुवातीच्या धक्क्यातून सावरत इंग्लंडने २५८ धावा केल्या. यात अनुभवी फलंदाज जो रूट आणि लियाम डॉसन यांच्या अर्धशतकांचा आणि सातव्या विकेटसाठीच्या १२१ धावांच्या भागीदारीचा वाटा होता. १३ व्या षटकात इंग्लंडच्या धावसंख्येवर एकही गडी बाद नव्हता. त्यानंतर २२ व्या षटकापर्यंत त्यांनी १०७ धावांत सहा गडी गमावले आणि यजमान संघ १५० धावांपर्यंत पोहोचेल असे वाटत नव्हते. पण, रूटच्या ७६ चेंडूंतील ७६ धावा आणि डॉसनच्या ८३ चेंडूंतील ६८ धावांनी संघाला संकटातून बाहेर काढले.
बुमराहने नऊ षटकांत ३१ धावा देऊन एक बळी घेतला, तर गुरनूर ब्रारने नऊ षटकांत ६१ धावा देऊन दोन बळी घेतले. प्रसिद्ध कृष्णाने १० षटकांत ५० धावा देऊन दोन बळी घेतले. उसळणाऱ्या आणि स्विंग होणाऱ्या खेळपट्टीवर इंग्लंडने फलंदाजी करण्याचा निर्णय घेतला. सहा आठवड्यांच्या विश्रांतीनंतर परतलेल्या बुमराहने आपल्या पहिल्या स्पेलमध्ये चार षटकांत केवळ आठ धावा दिल्या. जेकब बेथेल (३१ चेंडूंत १४ धावा) आणि बेन डकेट (४५ चेंडूंत ४३ धावा) त्याचा सामना करू शकले नाहीत. त्यांनी आपल्या स्पेलमध्ये ३६ निर्धाव चेंडू टाकले.
दुसऱ्या बाजून प्रसिद्धनेही चांगली गोलंदाजी केली. डकेटने ब्रारच्या पहिल्या षटकात १७ धावा दिल्या. ब्रारच्या पुढच्या षटकातही दोन चौकार मिळाले, पण तिसऱ्या षटकात त्याने तीन चेंडूंत दोन बळी घेतले. जास्त उसळी घेतलेल्या चेंडूवर त्याने बेथेलला आणि नंतर डकेटला बाद केले. बुमराहने थर्ड मॅन सीमारेषेवर डकेटचा एक अप्रतिम झेल घेतला. बुमराहच्या दुसऱ्या स्पेलमध्ये त्याने इंग्लंडचा कर्णधार हॅरी ब्रुकला बाद केले, ज्याचा झेल पहिल्या स्लिपमध्ये रोहित शर्माने घेतला. प्रसिद्धने जोस बटलर आणि सॅम करन यांच्या विकेट्स घेतल्या. मात्र, त्यानंतर रूट आणि डॉसन यांनी डाव सावरला.
---------------
हिंदुस्थान समाचार / वृषाली देशपांडे
