मुंबई, 16 जुलै, (हिं.स.)। अभिनेता हिमांश कोहलीच्या बहुप्रतिक्षित 'आर्यभट्ट का झिरो' या चित्रपटाचा टीझर प्रदर्शित झाला आहे. सुमारे एक मिनिट दहा सेकंदांच्या या टीझरमध्ये एका अशा तरुणाची कथा मांडली आहे, जो प्रेमभंग, कौटुंबिक दबाव, अपयश आणि समाजाची उपेक्षा यांसारख्या आव्हानांचा सामना करत स्वतःची ओळख आणि सन्मान मिळवण्यासाठी धडपडत आहे.

टीझरची सुरुवात एका टीव्ही न्यूज बुलेटिनने होते, ज्यामध्ये प्रेमात फसवणूक झालेला एक तरुण आयएएस (IAS) अधिकारी बनल्याची बातमी दिली जाते. त्यानंतर, हिमांशची व्यक्तिरेखा आपल्या पालकांसमोर आयएएस अधिकारी बनण्याचे स्वप्न मांडते, परंतु त्याला कुटुंबाचा विरोध सहन करावा लागतो.

टीझरमध्ये अभिनेता रवी किशन आपल्या खास शैलीत जीवनाचे अनुभव सांगताना दिसतात; त्यांचे संवाद कथेला भावनिक खोली आणि प्रेरणा देतात. त्याच वेळी, हिमांशचा संवाद मी खूप काळ गरिबासारखे जगलो आहे... आता मला सन्मान हवा आहे. हा चित्रपटाचा मुख्य संदेश अधोरेखित करतो. ॲक्शन, भावनिक आणि रोमँटिक दृश्यांसोबतच, पार्श्वभूमीवर वाजणारे 'दिल फर्जी' (Dil Farzi) हे गाणेही प्रेक्षकांचे लक्ष वेधून घेते.

या चित्रपटात हिमांश कोहलीने 'ब्रह्मगुप्त श्रीवास्तव' ऊर्फ 'बग्गू'ची भूमिका साकारली आहे. जो एक मध्यमवर्गीय तरुण असून परिस्थितीशी झुंज देत आत्मविश्वास आणि यशाच्या दिशेने वाटचाल करतो. हिमांशचा विश्वास आहे की आजची तरुण पिढी या व्यक्तिरेखेशी स्वतःला जोडू शकेल. या चित्रपटात सोनाली सहगल, दर्शना बनिक, रवी किशन, नरेश वोहरा, अलका अमीन, नीरज सूद आणि शिल्पा शिंदे यांच्याही महत्त्वपूर्ण भूमिका आहेत. कमल चंद्र दिग्दर्शित हा चित्रपट ७ ऑगस्ट रोजी चित्रपटगृहांमध्ये प्रदर्शित होणार आहे.

---------------

हिंदुस्थान समाचार / हर्षदा गावकर