मुंबई, 18 जुलै (हिं.स.)। लोकप्रिय टीव्ही क्विझ शो 'कौन बनेगा करोडपती' (KBC) १० ऑगस्टपासून आपल्या १८ व्या पर्वासाठी पुन्हा एकदा प्रेक्षकांच्या भेटीला येत आहे. यावेळी या शोच्या स्वरूपात आणि नियमांमध्ये अनेक महत्त्वपूर्ण बदल करण्यात आले आहेत. सोशल मीडियावर प्रदर्शित झालेल्या एका नवीन प्रोमोद्वारे, शोचे सूत्रसंचालक अमिताभ बच्चन यांनी स्पष्ट केले की, बदलत्या डिजिटल युगाचा विचार करता, स्पर्धकांची केवळ सामान्य ज्ञानावरच नव्हे, तर त्यांच्या विचार आणि विश्लेषण करण्याच्या क्षमतेवरही परीक्षा घेतली जाईल. या पर्वाची संकल्पना (थीम) 'सोचना पडेगा' (विचार करावा लागेल) अशी आहे.

प्रोमोमध्ये अमिताभ बच्चन नमूद करतात की, आजच्या जगात स्मार्टफोन आणि इंटरनेटमुळे माहिती सहज उपलब्ध आहे; त्यामुळे केवळ उत्तरे पाठ केल्याने यश मिळणार नाही. ते म्हणाले, आजकाल उत्तरे सर्वत्र उपलब्ध आहेत. अगदी तुमच्या खिशातही. म्हणूनच यावेळी केबीसीमध्ये काही बदल करण्यात आले आहेत. केवळ उत्तर आठवणे पुरेसे ठरणार नाही; तर त्या उत्तरापर्यंत पोहोचण्यासाठी विचार करावा लागेल. आणखी एका प्रोमोमध्ये त्यांनी संकेत दिले की, ही परीक्षा भूगोल, इतिहास आणि विज्ञान यांसारख्या विषयांच्या पारंपरिक ज्ञानाच्या पलीकडे जाऊन स्पर्धकांच्या तार्किक विचारक्षमतेचे (लॉजिकल रिझनिंग) मूल्यमापन करेल.

सन २००० मध्ये सुरू झालेला 'कौन बनेगा करोडपती' हा भारतीय टेलिव्हिजनवरील सर्वात यशस्वी कार्यक्रमांपैकी एक मानला जातो. शाहरुख खानने सूत्रसंचालन केलेले तिसरे पर्व वगळता, अमिताभ बच्चन यांनीच या शोच्या प्रत्येक पर्वाचे सूत्रसंचालन केले आहे. १० ऑगस्टपासून सुरू होणाऱ्या १८ व्या पर्वासह, 'बिग बी' केबीसीसोबतच्या त्यांच्या २६ वर्षांच्या प्रवासात एक नवीन अध्याय जोडण्यास सज्ज झाले आहेत.

---------------

हिंदुस्थान समाचार / हर्षदा गावकर