- भारतातील गृह-सजावट आणि संबंधित क्षेत्रातील (होम ट्रेड) प्रमुख वार्षिक प्रदर्शनाठी सरकारी, डिझाइन आणि व्यापार क्षेत्रातील दिग्गज एकत्र

मुंबई, 02 जुलै (हिं.स.) - होम टेक्सटाइल्स (गृह-वस्त्रोद्योग), होम डेकोर (गृह-सजावट), हाउसवेअर (घरगुती वस्तू) आणि गिफ्ट्स (भेटवस्तू) या क्षेत्रांतील भारतातील प्रमुख वार्षिक व्यापार प्रदर्शन असलेल्या 'HGH इंडिया'च्या १९ व्या आवृत्तीचे नुकतेच मुंबईतील नेस्को (NESCO) येथील बॉम्बे एक्झिबिशन सेंटरच्या हॉल क्रमांक ६ मध्ये अधिकृत उद्घाटन झाले. या उद्घाटनासह चार दिवस चालणाऱ्या प्रदर्शनाला उत्स्फूर्त प्रतिसाद मिळत आहे. यात ७०० हून अधिक भारतीय आणि आंतरराष्ट्रीय ब्रँड्स व उत्पादक सहभागी झाले असून, देशभरातून आणि परदेशातून सुमारे ५०,००० हून अधिक व्यावसायिक खरेदीदारांनी भेट दिली.

उद्घाटन सोहळ्याला भारत सरकारच्या वस्त्रोद्योग मंत्रालयाच्या वस्त्रोद्योग आयुक्त वृंदा मनोहर देसाई यांनी प्रमुख पाहुण्या म्हणून उपस्थित राहून शोभा वाढवली. सन्माननीय पाहुण्यांमध्ये इटलीचे महावाणिज्य दूत वॉल्टर फेरारा आणि MSSIDC चे व्यवस्थापकीय संचालक विकास पानसरे यांचा समावेश होता. या सोहळ्याला विशेष पाहुणे म्हणून ID केतन शेठ (अध्यक्ष, IIID MRC), आर्किटेक्ट रेझा काबुल (अध्यक्ष आणि मुख्य वास्तुविशारद, ARK रेझा काबुल आर्किटेक्ट्स), आर्किटेक्ट राजीव कासत (मुख्य वास्तुविशारद आणि मालक, राजीव कासत अँड असोसिएट्स) आणि आर्किटेक्ट मकरंद पाटसकर (मुख्य वास्तुविशारद, मकरंद पाटसकर आर्किटेक्ट) हे देखील उपस्थित होते. 'HGH इंडिया'चे आयोजक असलेल्या 'टेक्सझोन इन्फॉर्मेशन सर्व्हिसेस प्रा. लि.' चे व्यवस्थापकीय संचालक श्री. अरुण रुंगटा आणि 'एक्सपो + कन्सल्टिंग असोसिएट्स लि.' चे संचालक डॉ. गीर्ट बोटगर यांनी या सोहळ्याचे सूत्रसंचालन केले.

भारतीय गृह-सजावट आणि संबंधित उद्योगाला त्यांच्या महत्त्वाकांक्षेला साजेसे व्यासपीठ मिळावे, या विश्वासावर 'HGH इंडिया'ची उभारणी करण्यात आली आहे, असे 'टेक्सझोन इन्फॉर्मेशन सर्व्हिसेस प्रा. लि.' चे व्यवस्थापकीय संचालक अरुण रुंगटा म्हणाले. या क्षेत्राची डिझाइन, शाश्वतता आणि जागतिक दृष्टिकोन या बाबतीत ज्या असाधारण वेगाने प्रगती होत आहे, त्याचे प्रतिबिंब या १९ व्या आवृत्तीत दिसून येते. ७०० हून अधिक ब्रँड्स, हजारो व्यावसायिक खरेदीदार आणि सरकारी व डिझाइन क्षेत्रातील काही दिग्गज व्यक्तींचे मुंबईत स्वागत करताना आम्हाला अभिमान वाटत आहे. तसेच, पुढील चार दिवस अर्थपूर्ण व्यापार आणि नवनवीन कल्पनांची देवाणघेवाण होईल, अशी आशा व्यक्त केली.

भारत सरकारच्या वस्त्रोद्योग मंत्रालयाच्या वस्त्र आयुक्त, वृंदा देसाई म्हणाल्या, “उद्योग क्षेत्राचे नवोन्मेष, शाश्वतता आणि उत्कृष्ट डिझाइनवर असलेले प्रबळ लक्ष पाहून प्रोत्साहन मिळते. शाश्वतता हा आता केवळ एक शब्दप्रयोग राहिलेला नाही; तो व्यवसाय धोरणाचा एक अविभाज्य भाग बनला आहे. आज, गृहवस्त्र मूल्य साखळीमध्ये शाश्वत वस्त्रे, चक्रीयता आणि शोधक्षमतेवर वाढता भर दिला जात आहे. एचजीएच इंडिया उत्पादक, खरेदीदार आणि डिझाइनर्सना एकत्र येण्यासाठी, विचारांची देवाणघेवाण करण्यासाठी आणि अर्थपूर्ण सहकार्याला चालना देण्यासाठी एक उत्कृष्ट व्यासपीठ उपलब्ध करून देते. उद्योगाची वाढ, नवोन्मेष आणि अधिक शाश्वत भविष्याला पाठिंबा देणारे असे वैविध्यपूर्ण आणि गतिमान व्यासपीठ तयार केल्याबद्दल मी आयोजकांचे अभिनंदन करते.”

इटलीचे महावाणिज्य दूत वॉल्टर फेरारा म्हणाले, “भारत ही जगातील सर्वात गतिमान आणि वेगाने वाढणाऱ्या बाजारपेठांपैकी एक आहे, जिथे प्रीमियम होम फर्निशिंग, सजावट आणि डिझाइन-आधारित उत्पादनांची मागणी झपाट्याने वाढत आहे. इटली आणि भारतामध्ये कारागिरी, नावीन्य आणि गुणवत्तेबद्दल खूप आदर आहे, ज्यामुळे आमच्या उद्योगांमध्ये सहकार्याच्या उत्तम संधी निर्माण होतात. एचजीएच इंडियामधील अधिकृत इटालियन पॅव्हेलियनच्या माध्यमातून, आम्हाला पाच प्रतिष्ठित इटालियन ब्रँड्सची उत्कृष्टता प्रदर्शित करण्याचा अभिमान वाटतो. हे ब्रँड्स एकत्रितपणे इटालियन डिझाइन, सर्जनशीलता, टिकाऊपणा आणि कारागिरीच्या उत्कृष्ट परंपरांचे प्रतिनिधित्व करतात. आम्ही व्यावसायिक भागीदारी अधिक मजबूत करण्यासाठी आणि इटली व भारत यांच्यातील व्यापारी संबंध अधिक दृढ करण्यासाठी उत्सुक आहोत.”

बाजारपेठ विकास, ज्ञान वाटप, ट्रेंड फोरकास्टिंग आणि उत्पादन माहितीमध्ये ४० वर्षांहून अधिक अनुभव असलेल्या टेक्सझोनद्वारे आयोजित, एचजीएच इंडियाची १९ वी आवृत्ती ‘समकालीन, भविष्यवेधी आणि टिकाऊ’ या तीन स्पष्ट स्तंभांवर लक्ष केंद्रित करून पुढे जात आहे.

---------------

हिंदुस्थान समाचार / सुधांशू जोशी