जळगाव, 02 जुलै (हिं.स.) : जळगावच्या सुवर्ण बाजारपेठेत जुलै महिन्याच्या सुरुवातीलाच सोने आणि चांदीच्या दरांमध्ये मोठी अस्थिरता दिसून येत आहे. महिन्याच्या पहिल्याच दिवशी घसरण झाल्यानंतर, दुसऱ्याच दिवशी गुरुवारी बाजार उघडताच दोन्ही धातूंच्या किमतींमध्ये पुन्हा जोरदार वाढ नोंदवण्यात आली.

सराफ बाजारात आज सकाळी व्यवहार सुरू होताच २४ कॅरेट सोन्याच्या दरात प्रति १० ग्रॅम १,०३० रुपयांची वाढ झाली. त्यानंतर जीएसटीसह सोन्याचा दर १ लाख ४७ हजार २९० रुपये प्रति १० ग्रॅम इतका पोहोचला.

तर दुसरीकडे, चांदीच्या दरात प्रति किलो ५,१५० रुपयांची वाढ नोंदवली गेली असून, जीएसटीसह चांदीचा दर २ लाख ४१ हजार २० रुपये प्रति किलो झाला आहे.

याआधी बुधवारीही बाजारात तेजी पाहायला मिळाली होती, ज्यात सोन्याच्या दरात दिवसभरात ३०९ रुपयांची वाढ झाली होती आणि तो १ लाख ४६ हजार २६० रुपयांवर पोहोचला होता.

सराफा व्यावसायिकांच्या मते, जागतिक बाजारातील आर्थिक घडामोडी, अमेरिकन डॉलरमधील चढ-उतार, व्याजदरांबाबतची अनिश्चितता तसेच देशांतर्गत मागणीतील बदल यामुळे सोन्या-चांदीच्या दरांमध्ये सतत अस्थिरता निर्माण होत आहे.

दरम्यान, तज्ज्ञांनी ग्राहकांना घाईघाईने खरेदी न करता बाजारातील परिस्थितीचा अभ्यास करूनच गुंतवणुकीचे निर्णय घेण्याचा सल्ला दिला आहे.

--------------------

हिंदुस्थान समाचार / मनोहर कांडेकर