रायगड, 27 जुलै (हिं.स.)। महाड शहरातील करंजखोल गाव हद्दीतील रायगड सिटी बिल्डिंगमध्ये अज्ञात चोरट्याने बंद घर फोडून ९६ हजार रुपये किमतीचे सोन्याचे दागिने आणि रोख रक्कम चोरून नेल्याची घटना उघडकीस आली आहे. या प्रकरणी महाड शहर पोलीस ठाण्यात घरफोडीचा गुन्हा दाखल करण्यात आला असून पोलिसांनी तपास सुरू केला आहे.

पोलिसांनी दिलेल्या माहितीनुसार, २५ जुलै रोजी सायंकाळी ५.३० ते २६ जुलै रोजी सायंकाळी ५.३० या कालावधीत फिर्यादी व साक्षीदार घराबाहेर असताना अज्ञात चोरट्याने घराच्या मुख्य दरवाज्याची कडी, कोयंडा आणि कुलूप तोडून घरात प्रवेश केला. त्यानंतर बेडरूममधील कपाटातील सोन्याचे दागिने व रोख रक्कम असा एकूण रु.९६ हजारांचा ऐवज चोरून नेला.घटनेची माहिती मिळताच महाड शहर पोलिसांनी घटनास्थळी भेट देऊन पंचनामा केला. या प्रकरणी महाड शहर पोलीस ठाण्यात गुन्हा क्रमांक १०९/२०२६ नोंद करण्यात आला आहे. भारतीय न्याय संहिता (बीएनएस) २०२३ मधील कलम ३०५, ३३१(३) आणि ३३१(४) अन्वये तसेच संबंधित कायदेशीर तरतुदींनुसार गुन्हा दाखल करण्यात आला आहे.

या घरफोडीचा अधिक तपास पोलीस उपनिरीक्षक प्रदीप नाईक करीत असून, परिसरातील सीसीटीव्ही फुटेजची तपासणी आणि संशयितांचा शोध घेण्याचे काम सुरू आहे. पोलिसांनी नागरिकांना घरे दीर्घकाळ बंद ठेवताना शेजाऱ्यांना माहिती देण्यासह आवश्यक सुरक्षा उपाययोजना करण्याचे आवाहन केले आहे.

---------------

हिंदुस्थान समाचार / संदेश साळुंके (रायगड)