ढाका, 04 जुलै (हिं.स.)। म्यानमारच्या रखाइन राज्यात तीव्र होत असलेल्या लष्करी चकमकींमुळे बांगलादेश-म्यानमार सीमेजवळ तणाव वाढला आहे. सीमेलगतच्या टेकनाफ आणि आसपासच्या भागात राहणाऱ्या लोकांना भीती आहे की, हिंसाचारामुळे रोहिंग्या निर्वासितांची नवी लाट बांगलादेशकडे वळू शकते.
स्थानिक रहिवासी आणि रखाइनमध्ये राहणाऱ्या आपल्या नातेवाईकांच्या संपर्कात असलेल्या रोहिंग्या निर्वासितांच्या मते, गेल्या दोन दिवसांपासून सीमेपलीकडून सातत्याने जोरदार गोळीबार आणि स्फोटांचे आवाज ऐकू येत आहेत. म्यानमारच्या सैन्याने मौंगडाव, बुथिडांग आणि अराकान आर्मीच्या नियंत्रणाखालील इतर भागांमध्ये आपली लष्करी कारवाई अधिक तीव्र केल्याचे सांगितले जात आहे.
सीमावर्ती शाह पोरिर बेटावरील रहिवासी शाह आलम यांनी सांगितले की, स्फोट इतके शक्तिशाली होते की घरे भूकंपासारख्या तीव्रतेने हादरू लागली. मात्र, मोठ्या संख्येने रोहिंग्या नाफ नदीच्या काठावर बांगलादेशात प्रवेश करण्यासाठी प्रतीक्षा करत असल्याच्या वृत्तांना बांगलादेशी अधिकाऱ्यांनी अद्याप दुजोरा दिलेला नाही. अधिकाऱ्यांचे म्हणणे आहे की, सीमावरील परिस्थितीवर सातत्याने लक्ष ठेवले जात आहे. कॉक्स बाजार येथील बालूखाली निर्वासित छावणीतील एका रोहिंग्या समुदाय नेत्याने सांगितले की, मौंगडावमधील परिस्थिती अत्यंत गंभीर असून अनेक कुटुंबे सुरक्षित ठिकाणांच्या शोधात आहेत.
बांगलादेशात आधीपासूनच १० लाखांहून अधिक रोहिंग्या निर्वासित राहत आहेत. म्यानमारमध्ये अनेक वर्षांपासून सुरू असलेल्या हिंसाचारामुळे, विशेषतः २०१७ मधील मोठ्या पलायनादरम्यान, त्यांनी आपली घरे सोडून बांगलादेशात आश्रय घेतला होता. अशा परिस्थितीत रखाइनमध्ये पुन्हा वाढलेल्या हिंसाचारामुळे सीमा सुरक्षेबाबतची चिंता वाढली आहे. टेकनाफ उपजिल्हा प्रशासनाने सांगितले आहे की, आतापर्यंत कोणत्याही नव्या घुसखोरीची अधिकृत पुष्टी झालेली नाही. दरम्यान, बॉर्डर गार्ड बांगलादेश (बीजीबी) यांनी नाफ नदी आणि इतर संवेदनशील भागांमध्ये गस्त वाढवली आहे.
दरम्यान, म्यानमारच्या सीमेजवळ वाढत्या संघर्षाचा परिणाम थायलंडवरही झाला आहे. म्यानमारच्या सैन्य आणि करेन नॅशनल लिबरेशन आर्मी यांच्यातील संघर्षादरम्यान सीमापार झालेल्या गोळीबारात थायलंडच्या टाक प्रांतातील काही घरे नुकसानग्रस्त झाल्यानंतर थाई प्रशासनाने सर्व सीमापार मार्ग अनिश्चित काळासाठी बंद केले असून अतिरिक्त सुरक्षा दल तैनात केले आहेत.
---------------
हिंदुस्थान समाचार / Suraj Chaugule
