काराकास, 04 जुलै (हिं.स.)। व्हेनेझुएलामध्ये गेल्या महिन्यात आलेल्या दोन भीषण भूकंपांनंतर मृतांची संख्या वाढून 2,645 झाली आहे, तर 12,666 लोक जखमी झाले आहेत. ही माहिती देशाच्या संचार आणि माहिती मंत्रालयाने दिली. तुर्कियेच्या सरकारी वृत्तसंस्था अनादोलूने मंत्रालयाच्या हवाल्याने सांगितले की, मदत आणि बचाव कार्यादरम्यान आतापर्यंत 6,462 लोकांना सुरक्षित बाहेर काढण्यात आले असून 86,117 प्रभावित कुटुंबांना मदत पुरवण्यात आली आहे. भूकंपामुळे 885 इमारतींचे नुकसान झाले असून त्यापैकी 189 पूर्णपणे कोसळल्या आहेत.

सरकारने सांगितले की प्रभावित भागात 3,300 हून अधिक आंतरराष्ट्रीय बचावकर्मी तैनात करण्यात आले होते. याशिवाय मदत आणि पुनर्वसन कार्यांसाठी सुमारे 30,000 स्थानिक कर्मचाऱ्यांनाही नियुक्त करण्यात आले आहे. अमेरिकन भूगर्भीय सर्वेक्षणानुसार, 24 जून रोजी उत्तर व्हेनेझुएलामध्ये अवघ्या 39 सेकंदांच्या अंतराने 7.2 आणि 7.5 तीव्रतेचे दोन शक्तिशाली भूकंप झाले होते. 7.5 तीव्रतेचा भूकंप याराकुय राज्यातील युमारेपासून सुमारे 23 किलोमीटर आग्नेय दिशेला, तर 7.2 तीव्रतेचा भूकंप सॅन फेलिपपासून सुमारे 23.9 किलोमीटर ईशान्य दिशेला नोंदवण्यात आला होता.

मंत्रालयाने सांगितले की मुख्य भूकंपांनंतर आतापर्यंत 890 आफ्टरशॉक्स (भूकंपानंतरचे धक्के) नोंदवले गेले आहेत. प्रशासनाचे म्हणणे आहे की प्रभावित भागांमध्ये मदत, पुनर्वसन आणि पुनर्बांधणीचे कार्य सातत्याने सुरू आहे.

---------------

हिंदुस्थान समाचार / Suraj Chaugule