तेहरान , 05 जुलै (हिं.स.)। इराणचे दिवंगत सर्वोच्च नेते आयातुल्ला अली खामेनेई यांच्या अंत्यसंस्काराच्या विधींना सुरुवात झाली आहे. याच पार्श्वभूमीवर इराणचे राष्ट्राध्यक्ष मसूद पेजेशकियन यांनी शनिवारी स्पष्ट केले की, देश आपल्या शहीद नेत्याचा ध्वज कधीही झुकू देणार नाही. त्यांनी उंचावलेला ध्वज कायम अभिमानाने फडकत राहील, असा विश्वास त्यांनी व्यक्त केला.

राष्ट्राध्यक्ष पेजेशकियन यांनी सोशल मीडिया प्लॅटफॉर्म एक्स वर लिहिले की, २८ फेब्रुवारी रोजी अमेरिकन-इस्रायली हल्ल्यात मृत्यू झालेल्या खामेनेई यांच्याप्रती इराणी जनतेची निष्ठा कायम राहील. त्यांनी आपल्या पोस्टमध्ये म्हटले, “दुःखाने व्याकुळ असली तरी आशावादी असलेली इराणची महान जनता हे सिद्ध करून दाखवेल की, आपल्या शहीद नेत्याने ज्या ध्वजासाठी संघर्ष केला तो कधीही खाली झुकणार नाही. जगभरातील पीडित आणि शोषित लोकांना त्यांचे नेतृत्व आणि वारसा पुढे नेण्याची आमची इच्छा आहे.”

दरम्यान, निर्वासित इराणी युवराज रझा पहलवी यांनी एक्स वरील पोस्टमध्ये खामेनेई यांच्या अंत्ययात्रेवर तीव्र टीका केली. त्यांनी या कार्यक्रमाला इराणी सरकारचा प्रचार (प्रोपगंडा) असल्याचे म्हटले. पहलवी यांनी लिहिले, “तेहरानमध्ये अली खामेनेई यांच्या अंत्यसंस्कारासाठी आलेल्या परदेशी प्रतिनिधींना मी सांगू इच्छितो की, इराण त्यांच्यासाठी शोक व्यक्त करत नाही. इराण त्या ४० हजारांहून अधिक मुला-मुलींसाठी दुःखी आहे, ज्यांचा ८ आणि ९ जानेवारी रोजी खामेनेई, गालिबाफ आणि त्यांच्या दडपशाही यंत्रणेने बळी घेतला.”

इराणच्या सरकारी प्रसारमाध्यम प्रेस टीव्हीच्या वृत्तानुसार, तेहरानमधील ग्रँड इमाम खोमैनी मुसल्ला येथून सुरू झालेल्या अंत्ययात्रेत लाखो नागरिक सहभागी होत आहेत. मुख्य अंत्ययात्रा सोमवारी तेहरानमध्ये काढली जाणार आहे. त्यानंतर मंगळवारी कोम आणि गुरुवारी मशहद येथेही अंत्यसंस्काराशी संबंधित कार्यक्रम होणार आहेत.यानंतर आयातुल्ला अली खामेनेई यांना मशहदमधील इमाम रजा दर्ग्यात सुपूर्द-ए-खाक करण्यात येणार आहे.

---------------

हिंदुस्थान समाचार / Priyanka Bansode