नांदेड, 11 ऑगस्ट (हिं.स.)। मृद व जलसंधारण क्षेत्रातील उल्लेखनीय कार्याची दखल घेत माजी मुख्यमंत्री स्व. सुधाकररावजी नाईक यांचा जन्मदिन 21 ऑगस्ट हा दिवस ‘जलसंधारण दिन’ म्हणून साजरा करण्यात येणार आहे. त्यानुषंगाने राज्यात 15 ते 21 ऑगस्ट दरम्यान ‘जलसंधारण सप्ताह’ आयोजित करण्यात येणार आहे. या अनुषंगाने जिल्हाधिकारी राहुल कर्डिले यांच्या अध्यक्षतेखाली आज 11 ऑगस्ट रोजी जिल्हाधिकारी कार्यालयात बैठक घेण्यात आली. या बैठकीत ‘महा वॉकेथॉन-वॉक फॉर वॉटर’ या उपक्रमाच्या आयोजनाबाबत सविस्तर आढावा घेण्यात आला.

शाश्वत विकासासाठी मृदसंधारण व जलसंधारणाबाबत राज्यव्यापी जनजागृती करून जलसंवर्धनाला लोकचळवळीचे स्वरूप देण्याच्या उद्देशाने 21 ऑगस्ट रोजी ‘महा वॉकेथॉन-वॉक फॉर वॉटर’ या उपक्रमाचे राज्यातील सर्व 36 जिल्ह्यांमध्ये आयोजन करण्यात येणार आहे. याबाबत शासन निर्णय निर्गमित करण्यात आला आहे. तसेच येत्या 15 ते 21 ऑगस्ट दरम्यान जिल्ह्यात ‘जलसंधारण सप्ताह’ प्रभावीपणे साजरा करण्याच्या दृष्टीने संबंधित सर्व यंत्रणांनी आवश्यक नियोजन करून समन्वयाने कार्यवाही करावी, अशा सूचना जिल्हाधिकारी राहुल कर्डिले यांनी दिल्या.

---------------

हिंदुस्थान समाचार / Sangita Hanumant Rao Chitanis