नवी दिल्ली, 12 ऑगस्ट (हिं.स.)। राज्यसभेत केरळमधील सीपीआई (एम) खासदार जॉन ब्रिटास यांच्याबाबत कथित 'लुंगीवाला' टिप्पणीवरून बुधवारी सभागृहात जोरदार गोंधळ झाला. जॉन ब्रिटास यांनी आरोप केला की, भाजपा खासदार सुष्मिता देव यांनी त्यांच्यासाठी अपमानास्पद पद्धतीने लुंगीवाला या शब्दाचा वापर केला. यासंदर्भात त्यांनी राज्यसभेच्या सभापतींकडे विशेषाधिकार भंगाची नोटीस दिली आहे.

सभापती सीपी राधाकृष्णन यांनी सभागृहातील सर्व सदस्यांना मर्यादा राखण्याचा सल्ला दिला. त्यांनी म्हटले, माझ्या निदर्शनास काही अशी प्रकरणे आली आहेत, ज्यामध्ये सभागृहात बोलणाऱ्या सदस्यांच्या भाषणादरम्यान मध्येच टोका-टोकी करत असभ्य आणि गरिमेला प्रतिकूल अशा टिप्पणी करण्यात आल्या. मी सर्व माननीय सदस्यांना आग्रह करतो की, त्यांनी आपल्या सहकारी सदस्यांच्या भावना आणि संवेदनांना दुखावणे टाळावे. आपली संस्कृती विविधतेने परिपूर्ण आहे आणि कोणत्याही सदस्याच्या सांस्कृतिक परंपरेचा किंवा प्रादेशिक ओळखीचा अनादर होता कामा नये.

या प्रकरणावर सभागृहाचे नेते आणि केंद्रीय मंत्री जे.पी. नड्डा यांनी म्हटले की, या प्रकरणात केवळ एका पक्षाचे म्हणणे ऐकणे योग्य ठरणार नाही. त्यांनी आग्रह केला की, खासदार सुष्मिता देव यांनाही आपली बाजू मांडण्याची पूर्ण संधी दिली जावी, जेणेकरून सर्व तथ्यांच्या आधारे निष्पक्ष निर्णय घेतला जाऊ शकेल.

दरम्यान, जॉन ब्रिटास यांनी माध्यमांशी बोलताना म्हटले, त्या दिवशी जेव्हा मी सभागृहात बोलत होतो, तेव्हा भाजपा खासदार सुष्मिता देव यांनी माझ्यासाठी 'लुंगीवाला' सारखी अपमानास्पद टिप्पणी केली. त्यावेळी मी धोती परिधान केली होती आणि मला मलयाळी तसेच दक्षिण भारतीय असल्याचा अभिमान आहे. हा आपल्या सांस्कृतिक पोशाखाचा एक भाग आहे. मात्र, जेव्हा अशा प्रकारच्या ओळखीचा वापर एखाद्याला कमी लेखण्यासाठी किंवा अपमानित करण्यासाठी केला जातो, तेव्हा ते स्वीकारार्ह नाही. यावर सभागृहाने योग्य भूमिका घेतली पाहिजे. त्यांनी म्हटले की, सभागृहाने या प्रकरणावर योग्य भूमिका घेतली पाहिजे. आम्ही त्यांच्याविरोधात विशेषाधिकार भंगाची नोटीस दिली आहे. त्यांनी म्हटले की, वैयक्तिकरित्या त्यांच्या मनात कोणाविरुद्धही कोणतीही दुर्भावना नाही.

---------------

हिंदुस्थान समाचार / Suraj Chaugule