बेलफास्ट, 13 ऑगस्ट (हिं.स.)अफगाणिस्तानने पुन्हा एकदा आयर्लंडवर वर्चस्व गाजवत चौथा एकदिवसीय सामना ४२ धावांनी जिंकला. यामुळे पाच सामन्यांच्या मालिकेत त्यांना ३-० अशी विजयी आघाडी मिळाली. बेलफास्ट येथे खेळल्या गेलेल्या या सामन्यात अफगाणिस्तानने नऊ गडी गमावून ३४३ धावा केल्या. ही त्यांची एकदिवसीय सामन्यांमधील सर्वोच्च धावसंख्या होती. सादिकुल्ला अटलने १४३, तर सलामीवीर इब्राहिम झद्रानने १०७ धावा केल्या. प्रत्युत्तरात, अँडी बाल्बर्नीच्या (१०९) शतकानंतरही यजमान आयर्लंडचा संघ ४८ षटकांत ३०१ धावांवर गारद झाला. यामिन अहमदझाईने चार आणि राशिद खानने तीन बळी घेतले.

पहिल्या तीन एकदिवसीय सामन्यांपैकी दोन जिंकून अफगाणिस्तानने २०२७ च्या विश्वचषकात थेट स्थान मिळवले. चौथ्या एकदिवसीय सामन्यात त्यांच्या फलंदाजांनी वेगळ्याच पातळीचा खेळ दाखवला. रहमानुल्ला गुरबाज लवकर बाद झाला, पण अटल आणि झद्रान यांनी आपली बाजू सांभाळत दुसऱ्या विकेटसाठी २३१ धावांची भागीदारी केली. एकदिवसीय सामन्यांमध्ये अफगाणिस्तानची दुसऱ्या विकेटसाठीची ही सर्वोच्च भागीदारी होती. झद्रानने ५६ चेंडूंमध्ये आपले अर्धशतक आणि पुढील ५० धावा ५१ चेंडूंमध्ये पूर्ण करत आपले सातवे एकदिवसीय शतक झळकावले. अटलने आपल्या पहिल्या ५० धावा ६३ चेंडूंमध्ये पूर्ण केल्या आणि अवघ्या ९६ चेंडूंमध्ये आपले शतक पूर्ण केले. या फॉरमॅटमधील हे त्याचे दुसरे शतक होते.

झद्रानच्या खेळीत ११ चौकार आणि एका षटकाराचा समावेश होता, तर अटलच्या खेळीत १७ चौकार आणि चार षटकार होते. तो १५० धावांचा टप्पा ओलांडेल असे वाटत होते, पण गॅविन होने त्याला बाद केले. अफगाणिस्तानने शेवटच्या ४४ चेंडूंमध्ये सात विकेट गमावल्या, ज्यामुळे संघाला ३५० धावांचा टप्पा ओलांडता आला नाही. दरविश रसूली वगळता कोणताही फलंदाज २० पेक्षा जास्त धावा करू शकला नाही. आयर्लंडकडून ब्रायन मॅकडोनोने सर्वाधिक तीन बळी घेतले.

---------------

हिंदुस्थान समाचार / वृषाली देशपांडे