नवी दिल्ली, 14 ऑगस्ट (हिं.स.)। इंधन आणि वीज तसेच खाद्य वस्तूंच्या किमतीत नरमाई आल्यामुळे घाऊक महागाई दर जुलैमध्ये किंचित घटून ९.७८ टक्के राहिला, तर जूनमध्ये तो ९.८७ टक्के होता. देशाचा घाऊक महागाई दर सलग तिसऱ्या महिन्यात ९ टक्क्यांपेक्षा जास्त राहिला आहे.

वाणिज्य आणि उद्योग मंत्रालयाने मासिक आधारावर जारी केलेल्या आकडेवारीत सांगितले की, जुलै महिन्यात खनिज तेल (पेट्रोलियम उत्पादनांसह), खाद्य वस्तू, मूलभूत धातूंचे उत्पादन, बिगर-खाद्य वस्तू, खाद्य उत्पादनांचे उत्पादन तसेच रसायने आणि रासायनिक उत्पादनांचे उत्पादन हे घाऊक महागाईचे प्रमुख कारण ठरले.

आकडेवारीनुसार, इंधन आणि वीज क्षेत्रातील घाऊक महागाई जुलैमध्ये घटून २०.०५ टक्के झाली, जी जूनमध्ये २७.४१ टक्के होती. खाद्य वस्तूंची महागाईही जुलैमध्ये घटून ५.४४ टक्के राहिली, तर जूनमध्ये ती ५.४९ टक्के होती. मात्र, उत्पादित वस्तूंची महागाई जुलैमध्ये वाढून ८.२९ टक्के झाली, जी जूनमध्ये ७.४८ टक्के होती.

वाणिज्य आणि उद्योग मंत्रालयाच्या नव्या आधार वर्ष २०२२-२३ वर आधारित थोक किंमत निर्देशांकाच्या (डब्ल्यूपीआय) आकडेवारीनुसार, पहिल्यांदाच महागाईत मासिक आधारावर घट नोंदवण्यात आली आहे. मंत्रालयानुसार, पश्चिम आशियातील संकट आणि त्यामुळं होर्मुज सामुद्रधुनीमध्ये सुरू असलेल्या अडथळ्यामुळे जागतिक स्तरावर कच्चे तेल आणि खतांच्या किमती वाढल्या, ज्याचा परिणाम खाद्य वस्तूंच्या किमतींवरही झाला.

या आठवड्याच्या सुरुवातीला जारी करण्यात आलेल्या आकडेवारीनुसार, खाद्य वस्तूंच्या किमतीत वाढ झाल्यामुळे देशातील किरकोळ महागाई दर जुलैमध्ये वाढून ४.४५ टक्के झाला, जो जूनमध्ये ४.३८ टक्के होता. भारतीय रिझर्व्ह बँकेच्या (आरबीआय) मौद्रिक धोरण समितीने या महिन्याच्या सुरुवातीला झालेल्या आढावा बैठकीत धोरणात्मक दर म्हणजेच रेपो रेट ५.२५ टक्क्यांवर कायम ठेवला होता. तसेच, दक्षिण-पश्चिम मान्सून कमजोर आणि असमान राहण्याचा हवाला देत आर्थिक वर्ष २०२६-२७ साठी किरकोळ महागाईचा अंदाज ५ टक्के ठेवला होता.

---------------

हिंदुस्थान समाचार / Suraj Chaugule