पर्यावरण दिनानिमित्त विविध ठिकाणी वृक्षारोपण

वृक्षसंवर्धनाची उपस्थितांनी घेतली शपथ

अकोला, 17 ऑगस्ट (हिं.स.) : जागतिक पर्यावरण दिनानिमित्त अकोला पूर्व विधानसभा मतदारसंघात विविध ठिकाणी वृक्षारोपण करून पर्यावरण दिन उत्साहात साजरा करण्यात आला. आमदार रणधीर सावरकर यांच्या संकल्पनेतून संपूर्ण मतदारसंघात वृक्षारोपण अभियान राबविण्यात आले.

यावेळी खासदार अनुप धोत्रे यांनी पर्यावरणाचा समतोल राखण्यासाठी प्रत्येक नागरिकाने पुढाकार घेण्याचे आवाहन केले. “जागतिक पर्यावरणाचा समतोल राखण्यासाठी आणि पर्यावरणीय संकटापासून बचाव करण्यासाठी प्रत्येकाने आपले कर्तव्य पार पाडून वृक्ष जगवले पाहिजेत. प्रत्येकाने आपल्या आईच्या नावाने पाच वृक्ष दत्तक घेऊन पंतप्रधान नरेंद्र मोदी यांच्या आवाहनाला प्रतिसाद द्यावा,” असे त्यांनी सांगितले.

लोकसहभागातून पर्यावरण संवर्धन

प्रभाग क्रमांक 8 मध्ये आयोजित वृक्षारोपण कार्यक्रमाला आमदार रणधीर सावरकर, महानगर अध्यक्ष जयंत मसने, पवन महल्ले, नगरसेविका माधुरीताई क्षीरसागर, नगरसेवक राजेश्वर धोटे, रवी दुतोंडे, तुषार भिरड, माधव मानकर, किशोर कुचके, अंबादास उमाळे, उदय थोरात, सुरज शेळके, शिवा हिंदी, शिवा शर्मा, अनिल गरड, शुभम गरड, हर्षद चौधरी यांच्यासह मोठ्या संख्येने कार्यकर्ते व नागरिक उपस्थित होते.

यावेळी बोलताना आमदार रणधीर सावरकर म्हणाले की, कार्यकर्ते आणि नागरिकांच्या लोकसहभागातूनच जनकल्याणाची कामे प्रभावीपणे साध्य होऊ शकतात. जनतेचा सहभाग असेल तर अनेक समस्यांवर मात करता येते. जागरूक नागरिक हीच भारताची खरी ताकद असल्याचे त्यांनी नमूद केले.

पर्यावरण रक्षण ही काळाची गरज

पर्यावरण दिनाचे महत्त्व विशद करताना सावरकर यांनी राज्याच्या पर्यावरण मंत्री पंकजा मुंडे यांच्या आवाहनाला प्रतिसाद देऊन हा उपक्रम राबविण्यात आल्याचे सांगितले. पर्यावरणाचे संरक्षण करणे ही काळाची गरज असून, प्रत्येक नागरिकाने वृक्षारोपणासोबतच लावलेल्या वृक्षांचे संगोपन करण्याची जबाबदारी स्वीकारावी, असे आवाहन त्यांनी केले.

‘वृक्ष जगवा’ अभियानावर भर

अभियानाद्वारे पर्यावरणाचा समतोल राखण्यासाठी नागरिकांनी पुढाकार घ्यावा, प्रत्येकाने आईच्या नावाने पाच वृक्ष दत्तक घेऊन त्यांचे संगोपन करावे आणि पर्यावरण संरक्षणासाठी लोकसहभाग वाढवावा, असा संदेश देण्यात आला.

कार्यक्रमाच्या शेवटी उपस्थित सर्वांनी अधिकाधिक वृक्षारोपण करून लावलेल्या वृक्षांचे संगोपन करण्याची शपथ घेतली.

---------------------

हिंदुस्थान समाचार / जयेश गावंडे