नवी दिल्ली, 19 ऑगस्ट (हिं.स.)। काँग्रेस मीडिया विभागाचे अध्यक्ष पवन खेड़ा यांनी दिल्ली विद्यापीठाचे प्राध्यापक संगीत रागी यांनी काँग्रेस अध्यक्ष मल्लिकार्जुन खरगे यांच्याबाबत केलेल्या टिप्पणीचा निषेध केला आहे. खेड़ा यांनी म्हटले की, ‘दलित’ हा केवळ राजकीय शब्द नाही, तर ही त्या समुदायांची सामाजिक ओळख आहे, ज्यांनी पिढ्यानपिढ्या जातीय भेदभाव, बहिष्कार आणि अत्याचाराचा सामना केला आहे.

खेड़ा यांनी बुधवारी सोशल मीडिया प्लॅटफॉर्म एक्सवर प्रो. रागी यांच्या एका टीव्ही चर्चेदरम्यान केलेल्या टिप्पणीवर आक्षेप घेतला. खेड़ा यांनी म्हटले की, एखाद्या व्यक्तीने ‘दलित’ हा केवळ राजकीय शब्द असल्याचे सांगणे म्हणजे दलित समुदायांनी दीर्घकाळ सामना केलेल्या सामाजिक वास्तवाला पुसून टाकण्याचा प्रयत्न आहे. त्यांनी म्हटले की, दलित शब्दाकडे केवळ निवडणुकीतील ओळख म्हणून पाहणे म्हणजे इतिहास, अपमान, संघर्ष आणि सामाजिक प्रतिकाराच्या वास्तवाकडे दुर्लक्ष करणे होय. अशी विचारसरणी सामाजिक वास्तव पुसून टाकण्याचा प्रयत्न आहे.

काँग्रेस नेत्याने या टिप्पणीवरून भारतीय जनता पक्षावरही निशाणा साधला. त्यांनी म्हटले की, खरगे यांच्या विरोधात वारंवार केल्या जाणाऱ्या अशा टिप्पण्यांसाठी पंतप्रधान नरेंद्र मोदी आणि राष्ट्रीय स्वयंसेवक संघाचे प्रमुख मोहन भागवत यांनी माफी मागावी.

उल्लेखनीय आहे की, एका टीव्ही डिबेटमध्ये स्वातंत्र्यदिनाच्या दिवशी काँग्रेस मुख्यालयात वंदे मातरमच्या वेळी झालेल्या अस्वस्थतेवर चर्चा करताना प्रो. रागी यांनी म्हटले होते की, खरगे यांना काय झाले होते. ही त्यांची गुलामी आणि दलित मानसिकतेची ओळख आहे. हीच खरी दलित मानसिकता आहे. यावर डिबेटमधील इतर लोकांनी रागी यांच्या या वक्तव्याशी असहमती दर्शवल्यानंतर त्यांनी आपले वक्तव्य मागे घेतले.

---------------

हिंदुस्थान समाचार / Suraj Chaugule