प्योंगयांग, 19 ऑगस्ट (हिं.स.)।उत्तर कोरियाने अमेरिका आणि दक्षिण कोरियाच्या संयुक्त लष्करी सरावाचा निषेध केला आहे. या दोन्ही देशांकडून मिळणाऱ्या लष्करी धमक्यांना प्रत्युत्तर देण्यासाठी स्वसंरक्षणाच्या अधिकाराचा वापर करणे सुरूच ठेवू, असे उत्तर कोरियाने म्हटले आहे.

अमेरिकेचे राष्ट्राध्यक्ष डोनाल्ड ट्रम्प यांनी पेंटागॉनला या लष्करी सरावातील अमेरिकेचा सहभाग मोठ्या प्रमाणात कमी करण्याचे निर्देश दिल्यानंतर उत्तर कोरियाकडून हे वक्तव्य करण्यात आले आहे. ट्रम्प यांनी उत्तर कोरियाचे नेते किम जोंग उन यांच्यासोबत आपले अतिशय चांगले संबंध असल्याचाही उल्लेख केला आहे. ट्रम्प यांनी सोमवारी किम जोंग उन यांनी त्यांच्या पुढाकाराला प्रतिसाद दिल्याचेही सांगितले. मात्र, त्यांनी याबाबत कोणतीही सविस्तर माहिती दिली नाही.

दरम्यान, हा लष्करी सराव नियोजित वेळापत्रकानुसार सोमवारी सुरू झाला. मात्र, दक्षिण कोरियाच्या माध्यमांतील वृत्तानुसार, अमेरिकन लष्कराच्या कोरिया कमांडचे प्रमुख जनरल झेवियर ब्रन्सन यांनी मंगळवारी दक्षिण कोरियाच्या संरक्षण मंत्रालयाला भेट दिली. या भेटीत लष्करी सरावाचा व्याप्ती कमी करण्याच्या योजनांवर चर्चा करण्यात आली.

ट्रम्प हे किम जोंग उन यांच्यासोबत पुन्हा चर्चा सुरू करण्याचा प्रयत्न करत आहेत. किम जोंग उन यांच्या नेतृत्वाखालीच उत्तर कोरियाने संयुक्त राष्ट्रांच्या निर्बंधांची पर्वा न करता आपल्या अण्वस्त्र आणि क्षेपणास्त्र कार्यक्रमाचा विस्तार केला आहे.

---------------

हिंदुस्थान समाचार / Priyanka Bansode