ग्लासगो, 02 ऑगस्ट (हिं.स.)भारतीय बॉक्सर्सनी ग्लासगो येथे एका ऐतिहासिक कामगिरीत विक्रमी सात सुवर्णपदके जिंकून, आपल्या राष्ट्रकुल क्रीडा स्पर्धा २०२६ मधील मोहिमेचा शानदार समारोप केला. राष्ट्रकुल क्रीडा स्पर्धेच्या एकाच आवृत्तीत बॉक्सिंगमध्ये सात सुवर्णपदके जिंकणारा भारत हा पहिला देश ठरला आहे.यापूर्वी, इंग्लंडने दोनदा सहा सुवर्णपदके जिंकली होती (लंडन १९३४ आणि गोल्ड कोस्ट २०१८), तर कॅनडाने एडिनबर्ग १९८६ मध्ये या कामगिरीची बरोबरी केली होती.

ग्लासगो २०२६ मध्ये अंतिम फेरीत पोहोचून, भारताने राष्ट्रकुल क्रीडा स्पर्धेच्या इतिहासातील आपली सर्वात यशस्वी बॉक्सिंग मोहीम आधीच निश्चित केली आहे. या स्पर्धेने गोल्ड कोस्ट २०१८ मधील तीन सुवर्णांसह नऊ पदकांचा विक्रम मोडला. बॉक्सिंगच्या अंतिम दिवशी, साक्षी चौधरी (महिला ५१ किलो), प्रीती पवार (महिला ५४ किलो), जस्मिन लंबोरिया (महिला ५७ किलो), प्रिया घंघास (महिला ६० किलो), अरुंधती चौधरी (महिला ७० किलो), सचिन सिवाच (पुरुष ६० किलो) आणि अंकुश पांघल (पुरुष ८० किलो) यांनी सुवर्णपदके मिळवून पोडियमवर अव्वल स्थान पटकावले. ऑलिंपिक पदक विजेते लव्हलिना बोरगोहेन (महिला ७५ किलो), जादुमणी सिंग (पुरुष ५५ किलो) आणि नरिंदर बेरवाल (पुरुष +९० किलो) अंतिम फेरीत पराभूत झाले आणि त्यांना रौप्य पदकांवर समाधान मानावे लागले.

स्कॉटिश इव्हेंट कॅम्पसमध्ये, आशियाई क्रीडा स्पर्धेतील कांस्यपदक विजेती प्रीती पवारने महिलांच्या ५४ किलो वजनी गटात भारताची सुवर्णपदकांची मालिका कायम ठेवली.अंतिम फेरीत कॅनडाच्या स्कारलेट डेलगाडोचा एकमताने पराभव करून तिने सुवर्णपदक जिंकले.ऑलिम्पियन जस्मिन लँबोरियाने महिलांच्या ५७ किलो वजनी गटाच्या अंतिम फेरीत नॉर्दर्न आयर्लंडच्या मायकेला वॉल्शचा पराभव करून भारताच्या पदकांच्या संख्येत दुसऱ्या पदकाची भर घातली. वॉल्शने बर्मिंगहॅम २०२२ मध्ये याच गटात सुवर्णपदक जिंकले होते.

या गटातील विद्यमान विश्वविजेती असलेल्या जस्मिनने, प्रीती पवारप्रमाणेच ५-० ने विजय मिळवला, प वॉल्शने कडवे आव्हान दिले. वॉल्शने आपल्या कारकिर्दीतील चौथे राष्ट्रकुल क्रीडा पदक जिंकले.हे जस्मिनचे दुसरे राष्ट्रकुल क्रीडा पदक होते. तिने यापूर्वी बर्मिंगहॅम २०२२ मध्ये महिलांच्या ६० किलो वजनी गटात कांस्य पदक जिंकले होते.

मात्र, पुरुषांच्या ५५ किलो वजनी गटात, पहिल्या फेरीत आघाडी घेऊनही जादुमणी सिंग ऑस्ट्रेलियाच्या जय डिक्सनकडून ५-० ने पराभूत झाला आणि त्याला रौप्य पदकावर समाधान मानावे लागले.

त्यानंतर साक्षी चौधरीने महिलांच्या ५१ किलो वजनी गटाच्या अंतिम सामन्यात इंग्लंडच्या रुबी व्हाईटला ५-० ने पराभूत करून भारतासाठी आणखी एक सुवर्ण पदक मिळवले. या विजयामुळे, तिने १९ वर्षीय इंग्लिश बॉक्सरच्या वरिष्ठ कारकिर्दीतील ६८ लढतींची विजयी मालिकाही खंडित केली. विशेष म्हणजे, ग्लासगो २०२६ साठी भारतीय संघात स्थान मिळवण्यापूर्वी, साक्षीने निवड चाचण्यांमध्ये दोन विश्वविजेत्या, निखत झरीन आणि मीनाक्षी हुडा, यांना पराभूत केले होते. निखत झरीनने बर्मिंगहॅम २०२२ मध्ये ५० किलो वजनी गटात सुवर्णपदक जिंकले होते.

अरुंधती चौधरीनेही महिलांच्या ७० किलो वजनी गटात आपली प्रभावी कामगिरी सुरू ठेवली. उपांत्य फेरीत वेल्सच्या बर्मिंगहॅम २०२२ सुवर्णपदक विजेत्या रोझी एक्लेसला पराभूत केल्यानंतर, तिने अंतिम फेरीत इंग्लंडच्या ऑलिम्पियन आणि विश्व चॅम्पियनशिप कांस्यपदक विजेत्या शँटेल रीडला ५-० ने हरवून नवीन राष्ट्रकुल चॅम्पियन बनण्याचा मान मिळवला.

महिलांच्या अंतिम सामन्यात, लव्हलिना बोरगोहेनला ऑस्ट्रेलियाच्या विश्व चॅम्पियनशिप कांस्यपदक विजेत्या एमा-सू ग्रीनट्रीकडून ४-१ असा निसटता पराभव पत्करावा लागला. यामुळे तिला महिलांच्या ७५ किलो वजनी गटात रौप्यपदक मिळाले.

पहिल्या फेरीत, पाचपैकी चार पंचांनी एमा-सू ग्रीनट्रीच्या बाजूने १०-९ असा निर्णय दिला. तथापि, लव्हलिना बोरगोहेनने दुसऱ्या फेरीत शानदार पुनरागमन करत सामना बरोबरीत आणला. निर्णायक तिसऱ्या फेरीत दोन्ही बॉक्सरनी सर्वोत्तम कामगिरी केली, पण अखेरीस ऑस्ट्रेलियन बॉक्सरने बाजी मारली.

दरम्यान, पुरुषांच्या ६० किलो वजनी गटात, सचिन सिवाचने नामिबियाच्या ट्रायगेन मॉर्निंग न्डावेलोविरुद्ध एक चुरशीची लढत दिली आणि अखेरीस ३-२ अशा विभाजित निर्णयाने सुवर्णपदक जिंकले.या विजयासह, सचिनने २०१७ च्या राष्ट्रकुल युवा क्रीडा स्पर्धेतील सुवर्णपदकानंतर, वरिष्ठ स्तरावरील आपले पहिले राष्ट्रकुल क्रीडा सुवर्णपदक जिंकले.

पुरुषांच्या ८० किलो वजनी गटात, अंकुश पांघलने अंतिम फेरीत इंग्लंडच्या डिमेझी शिट्टूला ४-१ ने हरवून सुवर्णपदक जिंकले.त्यानंतर नरेंद्र बेरवाल पुरुषांच्या +९० किलो वजनी गटाच्या अंतिम फेरीत इंग्लंडच्या डामार थॉमसकडून ५-० ने पराभूत झाला आणि त्याला रौप्यपदकावर समाधान मानावे लागले. त्याने आपल्या आशियाई क्रीडा स्पर्धेतील कांस्यपदकात राष्ट्रकुल क्रीडा स्पर्धेतील रौप्यपदकाची भर घातली.

---------------

हिंदुस्थान समाचार / वृषाली देशपांडे