नवी दिल्ली, 02 ऑगस्ट (हिं.स.)शुभमन गिलच्या नेतृत्वाखालील टीम इंडिया लवकरच श्रीलंकेसाठी रवाना होणार आहे. भारत आणि श्रीलंका यांच्यातील पहिला कसोटी सामना १५ ऑगस्ट रोजी सुरू होणार आहे. पण, त्याआधी टीम इंडिया श्रीलंका दौऱ्यावर एक सराव सामना देखील खेळणार असून, यात एक महत्त्वपूर्ण बदल झाला आहे. मूळतः टीम इंडिया आणि श्रीलंका इलेव्हन यांच्यात चार दिवसांचा सराव सामना म्हणून नियोजित असलेला हा सामना आता तीन दिवसांचा करण्यात आला आहे.

टीम इंडिया आणि श्रीलंका इलेव्हन यांच्यातील चार दिवसांचा कसोटी सामना ७ ऑगस्ट रोजी सुरू होणार होता. यापूर्वी १० ऑगस्ट रोजी नियोजित असलेल्या सराव सामन्याऐवजी, हा सामना आता ७ ऑगस्ट रोजी सुरू होऊन ९ ऑगस्ट रोजी संपेल. बीसीसीआयने यापूर्वी चार दिवसांच्या सामन्याची घोषणा केली होती, पण आता तो कोलंबोच्या मैदानावर तीन दिवस खेळला जाईल.

टीम इंडियाच्या श्रीलंका दौऱ्याच्या प्रवासाच्या योजनेनुसार, सर्व क्रिकेटपटू ४ ऑगस्ट रोजी श्रीलंकेसाठी रवाना होतील. त्यानंतर भारतीय खेळाडू ७ ऑगस्टपासून कोलंबोच्या मैदानावर तीन दिवसीय सराव सामना खेळतील. या सामन्यानंतर, भारतीय संघाचे क्रिकेटपटू गॉलसाठी रवाना होतील आणि पहिला कसोटी सामना १५ ऑगस्टला सुरू होईल.

जर भारताला २०२५-२७ च्या जागतिक कसोटी चॅम्पियनशिपच्या अंतिम फेरीत पोहोचायचे असेल, तर त्यांना श्रीलंकेविरुद्धचे दोन्ही कसोटी सामने जिंकावेच लागतील. यानंतर, भारतीय संघ नोव्हेंबरमध्ये न्यूझीलंड दौऱ्यावर दोन कसोटी सामने खेळेल, त्यानंतर मायदेशात ऑस्ट्रेलियाविरुद्ध पाच सामन्यांची बॉर्डर-गावस्कर ट्रॉफी कसोटी मालिका खेळेल. अंतिम फेरीत पोहोचण्यासाठी भारताला उर्वरित नऊ कसोटी सामन्यांमध्ये पराभव टाळावा लागेल, अन्यथा परिस्थिती खूप कठीण होऊ शकते.

---------------

हिंदुस्थान समाचार / वृषाली देशपांडे