नवी दिल्ली, 02 ऑगस्ट (हिं.स.) भारताच्या टी-२० संघाचा उपकर्णधार तिलक वर्माला एक मोठी जबाबदारी देण्यात आली आहे. २३ ऑगस्टपासून सुरू होणाऱ्या दुलीप ट्रॉफीमध्ये तो दक्षिण विभागाचे कर्णधारपद भूषवणार आहे. आंध्र प्रदेशच्या रिकी भुई याची उपकर्णधारपदी नियुक्ती करण्यात आली आहे.

तिलक बऱ्याच काळापासून भारताच्या टी-२० संघाचा भाग आहे आणि अलीकडेच त्याने उपकर्णधारपद स्वीकारले होते. मुंबई इंडियन्समध्येही त्याला मोठी भूमिका देण्याबाबत काही चर्चा सुरू होती. त्यामुळे, त्यांची दक्षिण विभागाचे कर्णधार म्हणून नियुक्ती करणे हे दर्शवते की, बीसीसीआय त्याला नेतृत्वाची भूमिका देण्यासाठी विचारात घेत आहे.

कर्नाटकचा अनुभवी फलंदाज करुण नायर याचाही दक्षिण विभागाच्या संघात समावेश करण्यात आला आहे. करुण भारतीय संघात पुनरागमन करण्याचा प्रयत्न करत आहेत. गेल्या वर्षीच्या इंग्लंड दौऱ्यासाठी आठ वर्षांनंतर त्याला कसोटी संघात परत बोलावण्यात आले होते. पण चार सामन्यांमध्ये केवळ एक अर्धशतक झळकावल्यानंतर त्याला संघातून वगळण्यात आले होते. या संघात यष्टीरक्षक एन. जगदीसन याचाही समावेश आहे.

दुलीप ट्रॉफी २३ ऑगस्ट रोजी सुरू होत आहे, पण दक्षिण विभागाचा संघ थेट उपांत्य फेरीसाठी पात्र ठरेल, जी ३० ऑगस्ट रोजी खेळवली जाईल. याचे कारण असे की, दक्षिण विभागाचा संघ गेल्या हंगामात अंतिम सामना खेळला होता. गेल्या हंगामातील दोन्ही अंतिम स्पर्धक थेट उपांत्य फेरीसाठी पात्र ठरतात. मध्य विभागाने गेल्या हंगामातही अंतिम सामना जिंकला होता आणि यावेळी ते उपांत्य फेरी खेळतील. या संघाचे कर्णधारपद रजत पाटीदार भूषवणार आहे.

दुलीप ट्रॉफीसाठी दक्षिण विभागाचा संघ:

तिलक वर्मा (कर्णधार), रिकी भुई (उपकर्णधार), अभिनव तेजराना, एस. के. रशीद, के. हिमातेजा, आर. स्मरन, एन. जगदीसन, करुण नायर, टी. त्यागराजन, श्रेयस गोपाल, के. साई तेजा, टी. विजय, व्ही. कावेरप्पा आणि अमन खान.

---------------

हिंदुस्थान समाचार / वृषाली देशपांडे