मुंबई, 25 ऑगस्ट, (हिं.स.)। बजाज ऑटोने आपल्या लोकप्रिय पल्सर श्रेणीचा विस्तार करत अद्ययावत पल्सर १२५ आणि नवीन पल्सर १५० भारतीय बाजारात सादर केली आहे. नव्या मॉडेल्समध्ये आकर्षक डिझाइनसोबत आधुनिक तंत्रज्ञान, सुधारित चेसिस आणि अधिक चांगल्या कामगिरीवर भर देण्यात आला आहे. पल्सर १२५ ची सुरुवातीची किंमत ९२,९९० रुपये एक्स-शोरूम असून, पल्सर १५० ची सुरुवातीची किंमत १.१५ लाख रुपये एक्स-शोरूम ठेवण्यात आली आहे.

अद्ययावत पल्सर १२५ चार प्रकारांमध्ये उपलब्ध आहे. बेस मॉडेलची किंमत ९२,९९० रुपये असून स्टँडर्ड सिंगल सीट प्रकाराची किंमत ९९,२९१ रुपये आहे. स्टँडर्ड स्प्लिट सीट प्रकारासाठी १,००,२८८ रुपये, तर नव्या प्रीमियम स्प्लिट सीट प्रकारासाठी १,०४,३१८ रुपये मोजावे लागतील. जुन्या मॉडेलच्या तुलनेत प्रकारानुसार किंमतीत सुमारे २,५०० ते ६,००० रुपयांची वाढ झाली आहे.

नव्या पल्सर १२५ मध्ये १२४.३८ सीसी क्षमतेचे एअर-कूल्ड, सिंगल-सिलेंडर इंजिन देण्यात आले आहे. हे इंजिन ८,५०० आरपीएमवर १२.१ पीएस पॉवर आणि ६,५०० आरपीएमवर ११.४ एनएम टॉर्क तयार करते. त्यामुळे ही आतापर्यंतची सर्वाधिक शक्तिशाली पल्सर १२५ ठरते. या मोटरसायकलमध्ये पहिल्यांदाच मोनोशॉक रिअर सस्पेंशन देण्यात आले आहे. याशिवाय कलर एलसीडी इन्स्ट्रुमेंट क्लस्टर, एलईडी हेडलॅम्प आणि क्रॉल टेक्नॉलॉजी यांसारखी वैशिष्ट्ये देण्यात आली आहेत. उच्च प्रकारात पाच इंचांचा टीएफटी डिस्प्ले, कनेक्टेड फीचर्स आणि रेन, रोड व स्पोर्ट असे तीन रायडिंग मोड्स मिळतात.

दुसरीकडे, नवीन पल्सर १५० दोन प्रमुख प्रकारांत उपलब्ध आहे. सिंगल डिस्क प्रकाराची किंमत १.१५ लाख रुपये, तर ट्विन डिस्क प्रकारातील सिंगल सीट आणि स्प्लिट सीट मॉडेल्सची किंमत अनुक्रमे १.२२ लाख आणि १.२३ लाख रुपये आहे. नव्या पल्सर १५० मध्ये पूर्णपणे नवीन १५० सीसी इंजिन देण्यात आले असून ते ८,५०० आरपीएमवर १४ पीएस पॉवर आणि १४.१ एनएम टॉर्क निर्माण करते.

नवीन फ्रेम, मोनोशॉक रिअर सस्पेंशन, स्मोक्ड-इफेक्ट एलईडी हेडलॅम्प, एकात्मिक डीआरएल आणि हॅझार्ड लॅम्प्समुळे पल्सर १५० ला अधिक आधुनिक रूप मिळाले आहे. ट्विन डिस्क प्रकारात पाच इंचांचा टीएफटी डिस्प्ले, गुगल मॅप्स नेव्हिगेशन, एलईडी टर्न इंडिकेटर्स आणि इंटिग्रेटेड स्टार्टर जनरेटर म्हणजेच आयएसजी तंत्रज्ञान देण्यात आले आहे. या दोन्ही मोटरसायकलींमुळे १२५ आणि १५० सीसी कम्युटर-स्पोर्ट विभागात बजाजची स्पर्धात्मकता आणखी वाढण्याची शक्यता आहे. पल्सर १२५ ची थेट स्पर्धा टीव्हीएस रायडर १२५, हिरो ग्लॅमर एक्सटेक आणि होंडा शाइन १२५ यांसारख्या मोटरसायकलींशी होणार आहे.

---------------

हिंदुस्थान समाचार / Suraj Chaugule