ॲमस्टेलवीन (नेदरलँड्स), 25 ऑगस्ट (हिं.स.)२०२६ च्या हॉकी विश्वचषक स्पर्धेत भारतीय संघाची कामगिरी अतिशय निराशाजनक झाली. अर्जेंटिनाविरुद्धचा सामना भारतीय संघासाठी महत्त्वाचा होता. हरमनप्रीत सिंगच्या संघाकडून मोठ्या अपेक्षा होत्या, पण भारतीय संघ त्या पूर्ण करण्यात अपयशी ठरला. आश्चर्याची गोष्ट म्हणजे, भारतीय संघ दुसऱ्या फेरीत एकही सामना जिंकू शकला नाही आणि तिन्ही सामन्यांमध्ये पराभूत झाला.

भारताने हॉकी विश्वचषक फक्त एकदाच जिंकला आहे. त्यांनी १९७५ मध्ये हे विजेतेपद पटकावले होते. तेव्हापासून भारतीय संघाने कधीही विश्वचषक विजेतेपद जिंकलेले नाही. हरमनप्रीत सिंगच्या नेतृत्वाखालील संघाकडून मोठ्या अपेक्षा होत्या, पण या पराभवामुळे विश्वचषक जिंकण्याचे त्यांचे स्वप्न भंगले आहे. अर्जेंटिनाने भारतीय संघाचा ५-३ असा पराभव केला.अर्जेंटिनाविरुद्धच्या भारताच्या सामन्याची सुरुवात खराब झाली. अर्जेंटिनाने पहिल्या क्वार्टरच्या पहिल्याच मिनिटात पहिला गोल केला. जोकिन टॉस्कानीने पहिल्याच मिनिटात गोल केला. त्यानंतर निकोलस डेला टॉरेने सहाव्या मिनिटात दुसरा गोल करून अर्जेंटिनाला २-० अशी आघाडी मिळवून दिली. अर्जेंटिनाने दोन गोल केल्यामुळे भारतीय संघावरील दबाव वाढला. मात्र, पहिल्या क्वार्टरच्या १० व्या मिनिटाला सुखजीत सिंगने भारताचा पहिला गोल करून स्कोअर १-२ असा केला.

दुसऱ्या क्वार्टरमध्ये भारतीय संघ चांगला खेळला. दोन्ही संघांना गोल करता आला नाही. भारतीय संघासाठी चांगली गोष्ट ही होती की त्यांनी अर्जेंटिनाला एकही पेनल्टी कॉर्नर दिला नाही. मात्र, पहिल्या हाफच्या अखेरीस भारतीय संघ १-२ ने मागे होता.दुसऱ्या क्वार्टरमध्ये एकही गोल करू न शकलेल्या अर्जेंटिनाच्या संघाने तिसऱ्या क्वार्टरची सुरुवात शानदार केली. त्यांनी ३३ व्या मिनिटाला तिसरा गोल केला. तोमास डोमेनने अर्जेंटिनासाठी तिसरा गोल करून आघाडी ३-१ अशी वाढवली. भारताला तिसऱ्या क्वार्टरमध्ये पाच पेनल्टी कॉर्नर मिळाले, पण त्यांना त्याचा फायदा घेता आला नाही. भारतीय खेळाडूंना एकही गोल करता आला नाही. तोमास डोमेनने तिसऱ्या क्वार्टरमध्ये पुन्हा एकदा शानदार कामगिरी करत आपला दुसरा गोल केला. त्याने खेळाच्या ४५ व्या मिनिटाला गोल करून अर्जेंटिनाची आघाडी ४-१ अशी वाढवली.

चौथ्या क्वार्टरमध्ये अर्जेंटिनाने आपला पाचवा गोल करून ५-१ अशी आघाडी घेतली. तिथून पुढे भारताचा पराभव जवळजवळ निश्चित झाला होता. तथापि, भारतीय संघाने अखेरीस दोन गोल करून पराभवाचे अंतर कमी केले. सुखजीत सिंगने ५८ व्या मिनिटाला, तर हार्दिक सिंगनेही ६० व्या मिनिटाला गोल केला. यामुळे स्कोअर ५-३ झाला. या पराभवामुळे भारतीय संघ विश्वचषकातून बाहेर पडला आणि उपांत्य फेरीसाठी पात्र ठरू शकला नाही.

---------------

हिंदुस्थान समाचार / वृषाली देशपांडे