न्यूयॉर्क (अमेरिका), 26 ऑगस्ट (हिं.स.) : टेनिसमधील दिग्गज टेनिसपटू रॉजर फेडररने अमेरिकन ओपनमध्ये एक अविस्मरणीय पुनरागमन केले. जॉन मॅकएनरो, आंद्रे अगासी आणि अँडी रॉडिक यांसारख्या टेनिसमधील दिग्गजांसोबत एका विशेष 'एक्झिबिशन नाईट'मध्ये सहभागी होऊन त्याने 'आर्थर ॲश स्टेडियम'मधील प्रेक्षकांची मने जिंकली.

२०२२ मध्ये व्यावसायिक टेनिसमधून निवृत्ती घेतलेल्या आणि २० वेळा ग्रँडस्लॅम विजेतेपद पटकावलेल्या फेडररचे न्यूयॉर्कमधील प्रेक्षकांनी उभे राहून (स्टँडिंग ओव्हेशन देऊन) स्वागत केले. त्यानंतर त्याने आपला जुना प्रतिस्पर्धी रॉडिकविरुद्ध एक-सेटचा एकेरी सामना खेळला. फेडररने या सामन्यात ६-३ असा विजय मिळवला आणि त्यानंतर मॅकएनरोसोबत जोडी जमवून दुहेरीच्या सामन्यात अगासी आणि रॉडिक यांचा ७-५ असा पराभव केला.

फेडरर म्हणाला की

, न्यूयॉर्कमध्ये परतणे खूप छान वाटत आहे. हे अविश्वसनीय आहे. या कोर्टबद्दल, येथील चाहत्यांबद्दल आणि या शहराबद्दल माझ्या मनात खूप छान आठवणी आहेत. २००४ आणि २००५ मध्ये इथेच सर्व काही सुरू झाले; येथील विजयांमुळे न्यूयॉर्कबद्दलचे माझे प्रेम निर्माण झाले.

२००४ ते २००८ या काळात सलग पाच वर्षे यूएस ओपनचे विजेतेपद पटकावणाऱ्या या टेनिसपटूचे आर्थर ॲश स्टेडियमवरील कोर्टवर आगमन होताच एखाद्या नायकाप्रमाणे स्वागत करण्यात आले.

पहिल्या दिवसापासूनच माझे या शहरावर आणि या कोर्टवर प्रेम जडले, असे फेडरर म्हणाला. मला वाटते की सेंटर कोर्टवरचा माझा पहिला सामना आंद्रेविरुद्ध होता. त्याने मला ६-१, ६-२, ६-४ असे सहज हरवले होते. माझ्याकडे काहीच पर्याय उरला नव्हता. तेव्हा मी स्वतःशीच म्हणालो, 'ठीक आहे, रॉजर, हे इतके सोपे नाही आणि घाई करून चालणार नाही', असे सांगताना तो हसला.

स्वित्झर्लंडचा हा महान टेनिसपटू 'एटीपी क्रमांक १ क्लब'च्या २९ सदस्यांपैकी एक आहे आणि त्याने 'पीआयएफ एटीपी रँकिंग'मध्ये ३१० आठवडे अव्वल स्थान भूषवले आहे. सलग २३७ आठवडे जागतिक क्रमवारीत पहिल्या क्रमांकावर राहण्याचा त्याचा विक्रम आजही अबाधित आहे.

या महिन्याच्या सुरुवातीला वयाची ४५ वर्षे पूर्ण करणाऱ्या फेडररचा, शनिवार, २९ ऑगस्ट रोजी 'इंटरनॅशनल टेनिस हॉल ऑफ फेम'मध्ये समावेश केला जाणार आहे. दरम्यान या प्रदर्शनीय सामन्यामुळे फेडररचे ' अमेरिकन ओपन'मध्ये एक भावनिक पुनरागमन झाले. २००४ ते २००८ या काळात सलग पाच वेळा जिंकलेल्या विजेतेपदांमुळे न्यूयॉर्क आणि या स्पर्धेशी त्याचे एक अतूट नाते निर्माण झाले होते.

---------------

हिंदुस्थान समाचार / वृषाली देशपांडे