कोलंबो, 27 ऑगस्ट, (हिं.स.) - श्रीलंका दौऱ्यावर, शुभमन गिलच्या नेतृत्वाखालील भारतीय संघ दोन्ही कसोटी सामन्यांमध्ये सहज विजय मिळवून परतण्याच्या तयारीत होता. पण, गॉलनंतर, श्रीलंकेचा सोनल दिनुशा कोलंबोमध्ये भारतासाठी सर्वात मोठी डोकेदुखी ठरला. अंतिम दिवशी, भारतीय संघाला श्रीलंकेच्या उर्वरित चार विकेट्स घेण्यासाठी संघर्ष करावा लागला आणि पहिल्या डावात शतक झळकावलेल्या सोनलने भारतासाठी विजय कठीण करून टाकला. अखेरीस सामना अनिर्णित राहिला. या सामन्यात सोनल १३३ धावांवर नाबाद राहिला. अंतिम दिवशी, भारतीय संघाचे कसोटी गोलंदाज हतबल ठरले आणि ८१.४ षटकांत श्रीलंकेच्या चार विकेट्स घेण्यात अपयशी ठरले. २१६ धावांची आघाडी घेतल्यानंतर हताश कर्णधार शुभमन गिलने सामना अनिर्णित राखला. भारतीय संघाने १-० ने मालिका जिंकण्यात यश मिळवलं.

टीम इंडियाच्या पहिल्या डावात देवदत्त पडिक्कलने ११७ धावा आणि ध्रुव जुरेलने ११५ धावा केल्या. परिणामी, भारताने नऊ गडी गमावून ५०३ धावांवर आपला डाव घोषित केला. प्रत्युत्तरात, श्रीलंकेचा संघ पहिल्या डावात केवळ २९० धावाच करू शकला, ज्यामुळे त्यांना फॉलो-ऑन खेळावा लागला. मात्र, दुसऱ्या डावात सोनल आणि केशरा यांच्यासह श्रीलंकेच्या तळाच्या फलंदाजांनी उत्कृष्ट कामगिरी केली. चौथ्या दिवसाच्या अखेरपर्यंत श्रीलंकेने सहा गडी गमावून २२९ धावा केल्या होत्या आणि भारताला अंतिम दिवशी शक्य तितक्या लवकर चार बळी घेणे आवश्यक होते. पण येथूनच, अंतिम दिवशी सर्व काही बदलले.

अंतिम दिवशी सोनल दिनुशा आणि केशरा श्रीलंकेकडून फलंदाजीसाठी मैदानात उतरले. तेव्हा त्यांनी सातव्या विकेटसाठी ११२ धावांची भागीदारी रचली, ज्यामुळे भारतीय गोलंदाज एका विकेटसाठी हताश झाले. केशर १५० चेंडूंमध्ये ४६ धावांवर बाद झाला, पण सोनलने दुसऱ्या बाजूने किल्ला लढवला. केशरच्या पाठोपाठ, सोनलने १९६ चेंडूंमध्ये मालिकेतील आपले तिसरे कसोटी शतक पूर्ण केले आणि अरविंद डी सिल्वानंतर भारताविरुद्धच्या कसोटी मालिकेत तीन शतके झळकावणारा तो दुसरा श्रीलंकन फलंदाज ठरला. सोनलने फलंदाजी सुरू ठेवली आणि टीम इंडियाने श्रीलंकेला ४०२ धावांवर नऊ गडी बाद केले. पण, असिथा आणि सोनलने शेवटच्या विकेटसाठी २७ धावा जोडल्यानंतर, टीम इंडियाचा कर्णधार शुभमन गिलने श्रीलंकन फलंदाजांशी हस्तांदोलन करून कसोटी सामना अनिर्णित ठेवण्याचा निर्णय घेतला.

सोनल २६४ चेंडूंमध्ये आठ चौकार आणि दोन षटकारांसह १३३ धावांवर नाबाद राहिला, तर श्रीलंकेने ४२९ धावांवर नऊ गडी बाद असताना दिवसाचे सुमारे १७ षटके शिल्लक असताना २१६ धावांची आघाडी घेतली होती. परिणामी, भारताने सामना अनिर्णित ठेवण्यास सहमती दर्शवली. भारतासाठी दुसऱ्या डावात मानव सुथारने ४१ षटकांच्या स्पेलमध्ये तीन बळी घेतले, तर जडेजाने ३८.३ षटकांच्या स्पेलमध्ये तीन बळी घेतले.

---------------

हिंदुस्थान समाचार / वृषाली देशपांडे