सीबीआयने 40 लाखांच्या लाच प्रकरणी केली कारवाई

रायगड, 28 ऑगस्ट (हिं.स.) : महाराष्ट्रातील रायगड जिल्ह्यात 40 लाख रुपयांच्या लाचप्रकरणी केंद्रीय अन्वेषण विभागाने (सीबीआय) मोठी कारवाई केली आहे. सीजीएसटीचे अतिरिक्त आयुक्त आणि आयआरएस अधिकारी विनय कुमार कन्हेटी, रायगडचे सीजीएसटी अधीक्षक राकेश कुमार सिन्हा आणि खासगी व्यक्ती नरेंद्र राजपूत यांना सीबीआयने अटक केली आहे. एका दगड खाण कंपनीशी संबंधित जीएसटी आणि रॉयल्टीचा वाद निकाली काढण्यासाठी लाच मागितल्याचा आरोप आरोपींवर आहे.

सीबीआयच्या माहितीनुसार, सीजीएसटी अधीक्षक राकेश कुमार सिन्हा यांनी संबंधित प्रकरण निकाली काढण्यासाठी तक्रारदाराकडे सुरुवातीला 1.50 कोटी रुपयांची लाच मागितल्याचा आरोप आहे. त्यानंतर झालेल्या चर्चेनंतर ही रक्कम कमी करून 40 लाख रुपये करण्यात आल्याचे तपासात समोर आले.आरोपानुसार, सरकारी अधिकाऱ्यांनी लाचेची रक्कम स्वीकारण्यासाठी एका खासगी व्यक्तीचा मध्यस्थ म्हणून वापर केला. तक्रारदाराला त्याच्यामार्फत 40 लाख रुपये देण्यास सांगण्यात आले.

तक्रार प्राप्त झाल्यानंतर सीबीआयने सापळा रचला. या कारवाईदरम्यान नरेंद्र राजपूत याला 40 लाख रुपयांची लाच स्वीकारताना रंगेहाथ पकडण्यात आले. यानंतर झालेल्या चौकशी आणि कारवाईत सीजीएसटी अधीक्षक राकेश कुमार सिन्हा आणि अतिरिक्त आयुक्त विनय कुमार कन्हेटी यांची कथित भूमिका समोर आली. सीबीआयच्या म्हणण्यानुसार, लाचेची रक्कम स्वीकारल्याची बाब दोन्ही अधिकाऱ्यांनी मान्य केली. त्यानंतर तिघांनाही अटक करण्यात आली.

अटकेनंतर सीबीआयने आरोपींशी संबंधित विविध ठिकाणी झडती घेतली. या झडतीदरम्यान 43 लाख रुपयांची अतिरिक्त रोकड जप्त करण्यात आली. तसेच सुमारे 90 लाख रुपये किमतीचे दागिनेही आढळून आले.या प्रकरणात 40 लाख रुपयांच्या लाचेव्यतिरिक्त झडतीत सापडलेली रोकड आणि दागिनेही तपासाचा भाग आहेत. दगड खाण कंपनीशी संबंधित जीएसटी आणि रॉयल्टी प्रकरणात नेमकी कोणती भूमिका होती, तसेच या प्रकरणात आणखी कोणाचा सहभाग आहे का, याचा सीबीआय तपास करत आहे. अटक करण्यात आलेल्या तिन्ही आरोपींना सक्षम न्यायालयासमोर हजर करण्यात येत असून, प्रकरणाचा पुढील तपास सुरू आहे.

---------------------------------

हिंदुस्थान समाचार / मनीष कुलकर्णी