सेंट लुईस, 28 ऑगस्ट (हिं.स.)। भारतीय ग्रँडमास्टर आर. प्रज्ञानानंदने शानदार पुनरागमन करत इतिहास रचला. त्याने गुरुवारी फॅबियानो करूआनाला पराभूत करून ग्रँड चेस टूर फायनल जिंकणारा पहिला भारतीय खेळाडू होण्याचा मान मिळवला.

फायनलच्या शेवटच्या दिवशी प्रज्ञानानंद सहा गुणांच्या मोठ्या फरकाने पिछाडीवर होता, मात्र त्याने जबरदस्त कामगिरी करत दोन्ही रॅपिड डाव जिंकले. त्यानंतर ब्लिट्झमध्ये दबावपूर्ण सामन्यातही आघाडी कायम ठेवत 15-13 अशा स्कोअरने विजेतेपद आपल्या नावावर केले. हे प्रज्ञानानंदच्या कारकिर्दीतील आतापर्यंतचे सर्वात मोठे विजेतेपद आहे. या विजयासह त्याला दोन लाख अमेरिकन डॉलरची बक्षीस रक्कम मिळाली.

करूआनाने क्लासिकल सामन्यांनंतर सहा गुणांची आघाडी मिळवली होती. मात्र प्रज्ञानानंदने रॅपिड आणि ब्लिट्झमध्ये सामन्याचे चित्र पूर्णपणे बदलून टाकले. पहिल्या क्लासिकल सामन्यात त्याला 0-6 असा पराभव स्वीकारावा लागला, तर दुसरा सामना 3-3 असा बरोबरीत सुटला. त्यानंतर त्याने दोन्ही रॅपिड सामने जिंकून आघाडी मिळवली आणि चार ब्लिट्झ डावांमध्ये ती कायम ठेवली. विजेतेपद मिळवल्यानंतर प्रज्ञानानंदने सांगितले की, हे विजेतेपद जिंकून तो आनंदी आहे. त्याने ग्रँड चेस टूरला विश्व चॅम्पियनशिपनंतर परंपरेच्या दृष्टीने सर्वात महत्त्वाच्या स्पर्धांपैकी एक असल्याचे सांगितले.

---------------

हिंदुस्थान समाचार / Suraj Chaugule