मुंबई, 03 ऑगस्ट (हिं.स.)। बॉलिवूड अभिनेता सलमान खान यांनी अखेर त्यांच्या जबरदस्त फिटनेस ट्रान्सफॉर्मेशनबाबत मौन सोडले आहे. गेल्या काही महिन्यांपासून सोशल मीडियावर त्यांच्या बदललेल्या लूकची चर्चा सुरू होती आणि ते त्यांच्या आगामी 'एसवीसी 63' या चित्रपटासाठी वजन कमी करत असल्याची चर्चा होती. आता स्वतः अभिनेत्याने खुलासा केला आहे की त्यांनी 16 किलो वजन कमी केले आहे. सलमान यांनी हा खुलासा त्यांचा भाऊ सोहेल खानच्या रियलिटी शो 'अलायन्स'मध्ये हजेरी लावली असता केला. ते सोहेलला प्रोत्साहन देण्यासाठी या शोमध्ये पोहोचले होते.

शोदरम्यान सलमान यांनी मिश्कील अंदाजात सोहेलला त्याचे वजन कमी झाल्याचे सांगितले. यावर सोहेलने अभिमानाने सांगितले की त्याने 12 किलो वजन कमी केले आहे. त्यावर उत्तर देताना सलमान म्हणाले, मी 16 किलो वजन कमी केले आहे. सलमान यांच्या या खुलाशानंतर त्यांच्या फिटनेस ट्रान्सफॉर्मेशनबाबत सुरू असलेल्या सर्व चर्चांना पूर्णविराम मिळाला. गेल्या काही दिवसांपासून अभिनेता सातत्याने जिममधील त्यांचे फोटो आणि व्हिडिओ सोशल मीडियावर शेअर करत आहेत, ज्यांना चाहत्यांनी भरभरून प्रतिसाद दिला आहे.

वर्कफ्रंटबद्दल बोलायचे झाल्यास, सलमान खान दिग्दर्शक वामशी पेडिपल्ली यांच्या बहुप्रतीक्षित एक्शन-थ्रिलर 'एसवीसी 63'च्या तयारीत व्यस्त आहेत. या चित्रपटात ते प्रथमच दक्षिण भारतीय अभिनेत्री नयनतारा हिच्यासोबत स्क्रीन शेअर करताना दिसणार आहेत. दिल राजू यांच्या निर्मितीखाली तयार होत असलेल्या या चित्रपटाची गणना भारतीय चित्रपटसृष्टीतील मोठ्या प्रकल्पांमध्ये केली जात आहे. 'एसवीसी 63' ईद 2027च्या निमित्ताने चित्रपटगृहांमध्ये प्रदर्शित होण्याची अपेक्षा आहे.

---------------

हिंदुस्थान समाचार / Suraj Chaugule