नवी दिल्ली, 07 ऑगस्ट (हिं.स.)। ग्लोबल इन्व्हेस्टमेंट फर्म केकेआरच्या मालकीची कंपनी लीप इंडिया लिमिटेडचा 2,480 कोटी रुपयांचा आयपीओ आज सबस्क्रिप्शनसाठी लॉन्च करण्यात आला. या आयपीओसाठी 11 ऑगस्टपर्यंत बोली लावता येणार आहे. इश्यू बंद झाल्यानंतर 12 ऑगस्ट रोजी शेअर्सचे वाटप (अलॉटमेंट) केले जाईल, तर 13 ऑगस्ट रोजी वाटप झालेले शेअर्स डीमॅट खात्यात जमा केले जातील. कंपनीचे शेअर्स 14 ऑगस्ट रोजी बीएसई आणि एनएसईवर सूचीबद्ध (लिस्ट) होऊ शकतात. लॉन्चिंगनंतर दुपारी दोन वाजेपर्यंत या आयपीओला केवळ सहा टक्के सबस्क्रिप्शन मिळाले होते.

या आयपीओमध्ये बोली लावण्यासाठी प्रति शेअर 151 रुपये ते 159 रुपये असा प्राइस बँड निश्चित करण्यात आला आहे, तर लॉट साइज 94 शेअर्सचा आहे. या आयपीओमध्ये रिटेल गुंतवणूकदार किमान एक लॉट म्हणजेच 94 शेअर्ससाठी बोली लावू शकतात, ज्यासाठी त्यांना 14,946 रुपयांची गुंतवणूक करावी लागेल. त्याचप्रमाणे रिटेल गुंतवणूकदार 1,94,298 रुपयांच्या गुंतवणुकीतून कमाल 13 लॉटमधील 1,222 शेअर्ससाठी बोली लावू शकतात. या आयपीओअंतर्गत एक रुपया दर्शनी मूल्य (फेस व्हॅल्यू) असलेले एकूण 15,59,74,841 शेअर्स जारी केले जात आहेत. यामध्ये सुमारे 480 कोटी रुपयांचे 3,01,88,679 नवीन शेअर्स जारी केले जात आहेत, तर सुमारे दोन हजार कोटी रुपयांचे 12,57,86,162 शेअर्स ऑफर फॉर सेल (ओएफएस) विंडोद्वारे विकले जात आहेत.

या आयपीओमध्ये क्वालिफाइड इन्स्टिट्यूशनल बायर्स (क्यूआयबी) यांच्यासाठी 49.97 टक्के हिस्सा राखीव ठेवण्यात आला आहे. याशिवाय रिटेल गुंतवणूकदारांसाठी 34.98 टक्के हिस्सा आणि नॉन-इन्स्टिट्यूशनल इन्व्हेस्टर्स (एनआयआय) यांच्यासाठी 15 टक्के हिस्सा राखीव आहे. तसेच कंपनीच्या कर्मचाऱ्यांसाठी 0.05 टक्के हिस्सा राखीव ठेवण्यात आला आहे. या इश्यूसाठी जेएम फायनान्शियल लिमिटेड यांची बुक रनिंग लीड मॅनेजर म्हणून नियुक्ती करण्यात आली आहे, तर एमयूएफजी इनटाइम इंडिया प्रायव्हेट लिमिटेड यांची रजिस्ट्रार म्हणून नियुक्ती करण्यात आली आहे.

लीप इंडिया लिमिटेडच्या आर्थिक स्थितीबाबत बोलायचे झाल्यास, भांडवली बाजार नियामक सेबीकडे सादर करण्यात आलेल्या ड्राफ्ट रेड हेरिंग प्रॉस्पेक्टस (डीआरएचपी)मध्ये करण्यात आलेल्या दाव्यानुसार कंपनीची आर्थिक स्थिती सातत्याने मजबूत राहिली आहे. आर्थिक वर्ष 2023-24 मध्ये कंपनीला 37.17 कोटी रुपयांचा निव्वळ नफा झाला होता, जो पुढील आर्थिक वर्ष 2024-25 मध्ये वाढून 37.56 कोटी रुपयांवर पोहोचला. मागील आर्थिक वर्ष 2025-26 मध्ये कंपनीचा निव्वळ नफा झपाट्याने वाढून 62.34 कोटी रुपयांवर पोहोचला.

या कालावधीत कंपनीच्या महसुलातही सातत्याने वाढ झाली. आर्थिक वर्ष 2023-24 मध्ये कंपनीला 371.94 कोटी रुपयांचा एकूण महसूल मिळाला होता, जो आर्थिक वर्ष 2024-25 मध्ये वाढून 485.03 कोटी रुपयांवर पोहोचला. मागील आर्थिक वर्ष 2025-26 मध्ये कंपनीला 747.36 कोटी रुपयांचा महसूल मिळाला. या कालावधीत कंपनीवरील कर्जाचाही बोजा सातत्याने वाढत गेला. आर्थिक वर्ष 2023-24 च्या अखेरीस कंपनीवर 513.07 कोटी रुपयांचे कर्ज होते, जे आर्थिक वर्ष 2024-25 मध्ये वाढून 801.66 कोटी रुपयांवर पोहोचले. मागील आर्थिक वर्ष 2025-26 मध्ये कंपनीवरील कर्जाचा बोजा वाढून 1,017.73 कोटी रुपयांवर गेला.

कंपनीचा रिझर्व्ह आणि सरप्लसही या कालावधीत सातत्याने वाढत गेला. आर्थिक वर्ष 2023-24 च्या अखेरीस कंपनीचा रिझर्व्ह आणि सरप्लस 521.84 कोटी रुपयांवर होता, जो आर्थिक वर्ष 2024-25 मध्ये वाढून 606.09 कोटी रुपयांवर पोहोचला. मागील आर्थिक वर्ष 2025-26 मध्ये तो 678.78 कोटी रुपयांवर पोहोचला होता. या कालावधीत कंपनीच्या नेटवर्थमध्येही वाढ झाली. आर्थिक वर्ष 2023-24 मध्ये ती 714.18 कोटी रुपये होती, जी 2024-25 मध्ये वाढून 917.35 कोटी रुपयांवर पोहोचली. मागील आर्थिक वर्ष 2025-26 मध्ये कंपनीची नेटवर्थ 1,006.33 कोटी रुपयांवर पोहोचली. त्याचप्रमाणे ईबीआयटीडीए (अर्निंग बिफोर इंटरेस्ट, टॅक्सेस, डेप्रिसिएशन अँड अमॉर्टायझेशन) आर्थिक वर्ष 2023-24 मध्ये 209.92 कोटी रुपये होता, जो 2024-25 मध्ये वाढून 273.80 कोटी रुपयांवर पोहोचला. मागील आर्थिक वर्ष 2025-26 मध्ये कंपनीचा ईबीआयटीडीए 378.83 कोटी रुपये होता.

---------------

हिंदुस्थान समाचार / Suraj Chaugule