नवी दिल्ली, 07 ऑगस्ट (हिं.स.)। जागतिक बाजारातील नकारात्मक संकेत आणि वाढलेल्या विक्रीच्या दबावामुळे भारतीय शेअर बाजारात शुक्रवारी मोठी घसरण पाहायला मिळाली. दिवसभर अस्थिर वातावरणात व्यवहार झाल्यानंतर सेन्सेक्स आणि निफ्टी दोन्ही निर्देशांक कमजोरीसह बंद झाले. बाजारातील या घसरणीमुळे गुंतवणूकदारांच्या संपत्तीत तब्बल १.६१ लाख कोटी रुपयांची घट झाली.

मुंबई शेअर बाजाराचा प्रमुख निर्देशांक सेन्सेक्स ४५५.५९ अंकांनी घसरून ७८,४९९.१७ अंकांवर बंद झाला. सकाळच्या सत्रात सेन्सेक्स ४३८.६८ अंकांच्या घसरणीसह ७८,५१६.०८ अंकांवर उघडला होता. सुरुवातीच्या व्यवहारात खरेदीदारांनी बाजाराला आधार देण्याचा प्रयत्न केला. त्यामुळे सेन्सेक्स काही काळ ७८,७५७.४० अंकांपर्यंत पोहोचला. मात्र त्यानंतर विक्रीचा दबाव वाढल्याने निर्देशांक पुन्हा खाली आला आणि दिवसाच्या व्यवहारात तो ७८,३७७.०७ अंकांच्या नीचांकी पातळीवर गेला.

राष्ट्रीय शेअर बाजाराचा निफ्टी निर्देशांकही ६५.३५ अंकांच्या घसरणीसह २४,५७०.६५ अंकांवर स्थिरावला. निफ्टीची सुरुवात ९७.१० अंकांच्या कमजोरीसह २४,५३८.९० अंकांवर झाली होती. सुरुवातीला झालेल्या खरेदीमुळे निफ्टीने सुधारणा नोंदवत २४,६३०.४० अंकांची पातळी गाठली, मात्र नंतर झालेल्या जोरदार विक्रीमुळे निर्देशांक पुन्हा घसरला.

आज दिवसभराच्या व्यवहारात बीएसईमध्ये 4,460 समभागांमध्ये सक्रिय व्यवहार झाला. यापैकी 2,044 शेअर्स वाढीसह बंद झाले, तर 2,209 शेअर्स घसरले आणि 207 शेअर्स कोणत्याही हालचालीशिवाय बंद झाले. एनएसई मध्ये आज 2,998 समभागांमध्ये सक्रिय व्यवहार झाला. यापैकी 1,479 शेअर्स नफा कमावल्यानंतर हिरव्या रंगात बंद झाले आणि 1,519 शेअर्स तोटा सहन करून लाल रंगात बंद झाले. त्याचप्रमाणे सेन्सेक्समध्ये समाविष्ट असलेल्या 30 समभागांपैकी 14 समभाग वाढीसह आणि 16 समभाग घसरणीसह बंद झाले. तर निफ्टीमध्ये समाविष्ट असलेल्या 50 समभागांपैकी 23 समभाग हिरव्या चिन्हात आणि 27 समभाग लाल चिन्हात बंद झाले.

आजच्या व्यवहारात वाहन उद्योग आणि माहिती तंत्रज्ञान क्षेत्रातील शेअर्सना गुंतवणूकदारांचा चांगला प्रतिसाद मिळाला. निफ्टी वाहन निर्देशांक १.८४ टक्क्यांनी वाढला, तर माहिती तंत्रज्ञान निर्देशांक १.४२ टक्क्यांनी मजबूत झाला. याशिवाय भांडवली वस्तू, एफएमसीजी, आरोग्य सेवा आणि धातू क्षेत्रातील शेअर्समध्येही वाढ दिसून आली.

मात्र बँकिंग, तेल आणि वायू, सार्वजनिक क्षेत्रातील कंपन्या तसेच ग्राहक टिकाऊ वस्तू क्षेत्रातील शेअर्समध्ये विक्रीचे वातावरण राहिले. व्यापक बाजारात संमिश्र चित्र दिसले. मध्यम आकाराच्या कंपन्यांचा निर्देशांक ०.२२ टक्क्यांनी वाढला, तर लघु कंपन्यांचा निर्देशांक ०.०५ टक्क्यांनी घसरला. शुक्रवारच्या व्यवहारानंतर बीएसईवर नोंदणीकृत कंपन्यांचे एकूण बाजार भांडवल ४९४.९५ लाख कोटी रुपयांवरून कमी होऊन ४९३.३४ लाख कोटी रुपये झाले. त्यामुळे गुंतवणूकदारांच्या मालमत्तेत एका दिवसात १.६१ लाख कोटी रुपयांची घट झाली.

बाजारातील प्रमुख वाढणाऱ्या शेअर्समध्ये टीसीएस, ग्रासिम इंडस्ट्रीज, हिंडाल्को इंडस्ट्रीज, महिंद्रा अँड महिंद्रा आणि एचसीएल टेक्नॉलॉजी यांचा समावेश झाला. दुसरीकडे बजाज फायनान्स, बजाज फिनसर्व्ह, ट्रेंट लिमिटेड, आयसीआयसीआय बँक आणि जिओ फायनान्शियल या कंपन्यांच्या शेअर्समध्ये घसरण नोंदवली गेली. जागतिक बाजारातील अनिश्चितता आणि परदेशी बाजारातील दबाव कायम राहिल्यास आगामी सत्रांमध्येही भारतीय शेअर बाजारात चढ-उतार कायम राहण्याची शक्यता आहे.

---------------

हिंदुस्थान समाचार / Suraj Chaugule