इस्लामाबाद, 01 सप्टेंबर (हिं.स.)।

पाकिस्तानातील एका न्यायालयाने तुरुंगात असलेले माजी पंतप्रधान इमरान खान आणि त्यांची पत्नी बुशरा बीबी यांना एकांतवासात ठेवण्यास मनाई केली आहे. इस्लामाबाद उच्च न्यायालयाने (IHC) अदियाला तुरुंग प्रशासनाला निर्देश दिले आहेत की, तुरुंगाच्या नियमांनुसार इमरान खान आणि त्यांच्या पत्नी बुशरा बीबी यांची भेट घडवून आणण्याची व्यवस्था करावी. इमरान खान यांना कथितरित्या एकांतवासात ठेवल्याच्या विरोधात त्यांची बहीण अलीमा खान यांनी न्यायालयात धाव घेतल्यानंतर हा निर्णय देण्यात आला. तसेच, बुशरा बीबी यांची मुलगी मुबाशरा खावर मानेका यांनीही याचिका दाखल केली होती.

इस्लामाबाद उच्च न्यायालयाचे न्यायमूर्ती खादिम हुसैन सूमरो यांनी निर्णय देताना खान यांच्या कुटुंबीयांना तुरुंगाच्या नियमांनुसार त्यांची भेट घेण्याची परवानगी देण्याचे निर्देश दिले. तसेच, इमरान खान आणि त्यांच्या मुलांमध्ये दूरध्वनीवरून संभाषणाची व्यवस्था करण्याचे आदेश अधिकाऱ्यांना दिले. उच्च न्यायालयाने अदियाला तुरुंग प्रशासनाला इमरान खान यांना दररोज वर्तमानपत्रे आणि पुस्तके उपलब्ध करून देण्याचे तसेच तुरुंगाच्या नियमांनुसार त्यांना वैद्यकीय सुविधा मिळत असल्याची खात्री करण्याचेही निर्देश दिले.

अदियाला तुरुंगाच्या अधीक्षकांना न्यायालयाच्या निर्देशांची अंमलबजावणी सुनिश्चित करण्यास आणि 15 दिवसांच्या आत अनुपालन अहवाल सादर करण्यास सांगण्यात आले आहे. इमरान खान ऑगस्ट 2023 पासून तुरुंगात आहेत. त्यांच्या समर्थकांनी आणि नातेवाईकांनी वारंवार आरोप केला आहे की, अधिकाऱ्यांनी कुटुंबीयांना भेटण्याची तसेच योग्य वैद्यकीय उपचार घेण्याची त्यांची सुविधा मर्यादित केली आहे. मात्र, पाकिस्तान सरकारने हे आरोप फेटाळून लावले आहेत.

बुशरा बीबी यांना भ्रष्टाचाराशी संबंधित एका प्रकरणात दोषी ठरवल्यानंतर प्रथम 31 जानेवारी 2024 रोजी तुरुंगात पाठवण्यात आले होते. सुमारे नऊ महिने तुरुंगात राहिल्यानंतर 24 ऑक्टोबर 2024 रोजी त्यांची जामिनावर सुटका झाली होती.त्यानंतर 17 जानेवारी 2025 रोजी भ्रष्टाचाराशी संबंधित आणखी एका प्रकरणात दोषी ठरवल्यानंतर बुशरा बीबी यांना पुन्हा अटक करण्यात आली आणि तेव्हापासून त्या अदियाला तुरुंगात बंद आहेत.

गेल्या महिन्यात पाकिस्तानच्या सर्वोच्च न्यायालयाने सरकारला खान यांना खासगी ‘शिफा इंटरनॅशनल हॉस्पिटल’मध्ये हलवण्याचे आदेश दिले होते. त्यांच्या कुटुंबीयांकडून आणि समर्थकांकडून त्यांच्या प्रकृतीबाबत, विशेषतः याच वर्षाच्या सुरुवातीला निदान झालेल्या डोळ्यांच्या आजाराबाबत, अनेक महिन्यांपासून चिंता व्यक्त केली जात होती. त्यानंतर हा आदेश देण्यात आला होता.

मात्र, 20-21 ऑगस्टच्या मध्यरात्री खान यांना शिफा हॉस्पिटलऐवजी सरकारी ‘पाकिस्तान इन्स्टिट्यूट ऑफ मेडिकल सायन्सेस’ (PIMS) येथे वैद्यकीय प्रक्रिया आणि तपासणीसाठी दाखल करण्यात आले. त्यानंतर त्यांना पुन्हा अदियाला तुरुंगात पाठवण्यात आले.

---------------

हिंदुस्थान समाचार / Priyanka Bansode