मुंबई , 10 सप्टेंबर (हिं.स.)। बराच काळ आयफोन फोल्डची प्रतीक्षा करणाऱ्या टेकप्रेमींची अखेर प्रतीक्षा संपली आहे. अॅपलने आपला पहिला फोल्डेबल आयफोन ‘आयफोन ड्युओ’ या नावाने सादर केला आहे. याची रचना पुस्तकाप्रमाणे उघडणारी असून, फोल्ड केल्यानंतर हा फोन पासपोर्टसारखा दिसतो.

आयफोन ड्युओमध्ये बाहेरील बाजूस ५.४ इंचांचा डिस्प्ले देण्यात आला आहे, तर फोन उघडल्यानंतर आत ७.६ इंचांची मोठी स्क्रीन मिळते. अॅपलच्या म्हणण्यानुसार, आतापर्यंत कोणत्याही आयफोनमध्ये देण्यात आलेला हा सर्वात मोठा डिस्प्ले आहे. फोनला प्रीमियम लूक देण्यासाठी टायटॅनियम फ्रेम आणि सिरॅमिक-सील्ड ग्लासचा वापर करण्यात आला आहे. हा फोन आयपी६८ रेटिंगसह येतो, त्यामुळे धूळ आणि पाण्यापासून त्याचे संरक्षण होते.

आयफोन ड्युओ सध्या स्टार व्हाइट आणि नाइट स्काय या दोन रंगांमध्ये उपलब्ध करण्यात आला आहे. कामगिरीसाठी यात ए२० प्रो चिप देण्यात आली आहे. फोनच्या मागील बाजूस दोन ४८ मेगापिक्सेलचे कॅमेरे देण्यात आले आहेत. तसेच, यात अॅपल पेन्सिल सपोर्ट देण्यात आला आहे. आयफोनमध्ये पहिल्यांदाच हे फीचर पाहायला मिळणार आहे.

आयफोन ड्युओचे बेस मॉडेल २५६ जीबी स्टोरेजसह येते. अॅपलच्या फोल्डेबल आयफोनचे वैशिष्ट्य म्हणजे त्याची रुंद, पुस्तकासारखी रचना. कंपनीने हा फोन अशा पद्धतीने डिझाइन केला आहे की, फोल्ड केल्यानंतर तो नेहमीच्या स्मार्टफोनप्रमाणे वापरता येईल आणि उघडल्यानंतर मोठ्या स्क्रीनच्या डिव्हाइसमध्ये त्याचे रूपांतर होईल.

आयफोन ड्युओमध्ये ए२० प्रो चिपसेट देण्यात आला आहे. हा चिपसेट २ नॅनोमीटर प्रक्रियेवर आधारित असून, यात सहा-कोअर प्रोसेसर आणि ३२-कोअर एनपीयू देण्यात आला आहे.कनेक्टिव्हिटीसाठी फोनमध्ये केवळ ई-सिमचा पर्याय देण्यात आला आहे. म्हणजेच, यात फिजिकल सिम कार्ड वापरण्याची सुविधा उपलब्ध नाही. भारतात ऍपलच्या पहिल्या फोल्डेबल आयफोन ड्युओची सुरुवातीची किंमत २,९९,९०० रुपये निश्चित करण्यात आली आहे. बेस मॉडेलमध्ये २५६ जीबी स्टोरेज मिळते. तर हा फोन कमाल २ टीबी स्टोरेजसह खरेदी करता येणार आहे.

प्री-बुकिंगबाबत बोलायचे झाल्यास, आयफोन ड्युओची बुकिंग १२ सप्टेंबरपासून सुरू होईल, तर त्याची विक्री १८ ऑक्टोबरपासून सुरू होणार आहे.ऍपलचे नवे मुख्य कार्यकारी अधिकारी जॉन टर्नस यांनी आयफोन ड्युओला कंपनीच्या विविध टीम्सच्या सर्जनशीलतेचा, कौशल्याचा आणि मेहनतीचा परिणाम असल्याचे म्हटले आहे. ग्राहकांसाठी काहीतरी खास तयार करण्याच्या उद्देशाने अॅपलच्या विविध टीम्सनी एकत्रितपणे सर्वोत्तम काम केले, तर काय साध्य होऊ शकते, हे आयफोन ड्युओ दाखवून देतो, असे त्यांनी सांगितले.

टर्नस यांनी आयफोन ड्युओ, आयफोन १८ प्रो आणि आयफोन १८ प्रो मॅक्स यांना युजर्ससाठी ‘स्मार्ट पर्सनल हब’ म्हणून सादर केले. त्यांच्या मते, ऍपल वॉच आणि एअरपॉड्सच्या नव्या रेंजसोबत हे डिव्हाइस युजर्सना अधिक वैयक्तिक आणि स्मार्ट पद्धतीने निर्मिती करणे, संवाद साधणे, उत्पादक राहणे, मनोरंजनाचा आनंद घेणे तसेच निरोगी आणि सक्रिय जीवनशैली राखणे यासाठी मदत करतील.

---------------

हिंदुस्थान समाचार / Priyanka Bansode